Տնօրենը թույլ չի տվել մտնել դպրոց, տնտեսվարը ոտքով հարվածել է. ծնողն ահազանգում է. News. am
Արարատի մարզի Տիգրանաշեն գյուղի բնակչուհին ահազանգում է՝ օրերս գյուղի դպրոցի տնօրենն իրեն թույլ չի տվել մտել դպրոց, որտեղ սովորում են իր երեխաները, իսկ տնտեսվարը ոտքով հարվածել է։ Այս մասին գրում է NEWS.am–ը։
Լրատվամիջոցի հետ զրույցում Աիդա Կարապետյանը պատմում է, որ դպրոցի ուսուցիչների և տնօրենի հետ հարաբերությունները միշտ էլ լարված են եղել, ասում է՝ իր երեխաներին մշտապես հոգեբանական ճնշման են ենթարկել գնահատականների պատճառով։
«Վերջերս էլ, Տիգրանաշենի բնակչուհու խոսքով, գրականության ուսուցչուհին դասը չսովորելու համար ապտակել էր 5-րդ դասարանի աշակերտներից մեկին։
Աիդա Կարապետյանն ավելի ուշ տեսանկարահանել էր աշակերտի հետ զրույցը, որտեղ տղան պատմում էր տեղի ունեցածի մասին, և դեպքի մասին հայտնել իրավապահներին։ Միջադեպից հետո դպրոցի անձնակազմի հետ լարվածությունն ավելի է սրվել։
«Ծնողը երբեք չի վիճում գնահատականի համար, ծնողը վիճում է սխալների, երեխայի նկատմամբ ցուցաբերված ոչ ճիշտ մոտեցման համար։ Գնացի դպրոց, տնօրենի հետ զրուցելու, ասաց, որ չի ուզում ինձ հետ խոսել։ Նշեցի, որ երեխաների համար հաց եմ բերել, և պետք է փոխանցեմ։ Տնօրենն իրեն հարիր ժարգոնով ասաց՝ սպասի՛ր, զանգը կտա, դուրս կգան։ Նրան թեթև հրելով ներս մտա դպրոց»,–պատմեց Տիգրանաշենի բնակչուհին։
Նա, իր խոսքով, դպրոց մտնելուց հետո նկատել է, թե ինչպես է տնտեսվարը մտնում ուսուցչանոց և դուրս գալիս, ենթադրում է, թե այդ ժամանակ էլ անջատել են միջանցքի տեսախցիկները։ Ապա տնտեսվարը մոտեցել է ու սկսել հեռախոսով տեսանկարահանել տեղի ունեցողը»,- գրել է լրատվամիջոցը։
