ՏԵՍԱՆՅՈՒԹ. Վոլոդինը հայտնել է ԽՍՀՄ-ի փլուզման պատճառը

ՌԴ Պետդումայի խոսնակ Վյաչեսլավ Վոլոդինը խոսել է ԽՍՀՄ փլուզման ու այն ժամանակվա հայտնի ու սիրված ֆիլմի դերի մասին։

 Պետդումայի նիստի ժամանակ, որում քննարկվում էր երեխաներին ազատ գաղափարախոսության քարոզչությունն արգելող օրինագիծը, Պետդումայի նախագահ Վյաչեսլավ Վոլոդինը հիշեց «Интердевочка» ֆիլմը և Խորհրդային Միության փլուզմանը հանգեցրած իրադարձությունները։ Հանդիպումը հեռարձակվել է «Дума ТВ»-ով։

 «Տեսեք, թե որտեղից սկսվեց Խորհրդային Միության կործանումը. 1989 թվականին, դեռևս այն օրերին, երբ ակտիվորեն աշխատում էր ԽՄԿԿ Կենտկոմը, էկրան բարձրացավ «Ինտերաղջիկ» ֆիլմը։ Բոլորը ծափահարեցին, կինոթատրոններում հերթեր էին, անգամ Կենտկոմի քարտուղարներն էին նայում։ Ի՞նչ է ստացվում: Միությունն այլևս գոյություն չունի»,- մեկնաբանել է Վոլոդինը։

Խոսքը երկու մասից բաղկացած ֆիլմի մասին է, որը ստեղծվել է Պյոտր Տոդորովսկու կողմից՝ Վլադիմիր Կունինի համանուն պատմության հիման վրա։

Գլխավոր հերոսը մարմնավաճառուհի է, ով երազում է ամուսնանալ օտարերկրացու հետ և մեկնել արտերկիր՝ հույս ունենալով դառնալ պատկառելի տիկին։ Սակայն, հասնելով իր երազանքին, նա հասկանում է, որ այդպես էլ երջանկություն չի գտել։ Ֆիլմի ավարտը ողբերգական է ստացվում. հայտնի է դառնում նրա մութ անցյալը, որի հետևանքով հալածում են մորը։