Հայկական կողմը որոշել է չշարունակել բրյուսելյան գործընթացը․ Ալիև
Ադրբեջանի նախագահ Իլհամ Ալիևը Բաքվում՝ Բելգիայի նոր դեսպան Ժուլիեն դե Ֆրեյպոյի հետ հանդիպմանը տարօրինակ է համարել Երևանի առաջարկը՝ կնքել խաղաղության պայմանագիրը կիսատ, հայտնում է պետության ղեկավարի մամուլի ծառայությունը։
Անդրադառնալով Ադրբեջանի և Եվրամիության հարաբերություններին՝ նա ասել է, թե Բրյուսելն այն վայրն էր, որտեղ Եվրոպական Միության Խորհրդի նախագահ Շառլ Միշելի աջակցությամբ հաջողությամբ ընթանում էին Հայաստանի և Ադրբեջանի միջև բանակցությունները, և այնտեղ իսկապես կարևոր առաջընթաց է գրանցվել:
«Բայց, ցավոք, հայկական կողմը որոշել է չշարունակել այս գործընթացը, որը կոչվում է «բրյուսելյան»։ Սակայն, ամեն դեպքում, դա դրական գործընթաց էր, որը շատ լավ արդյունք և փորձ տվեց»,- ասել է Ալիևը։
Ավելի վաղ, ելույթ ունենալով Մոսկվայում ԱՊՀ գագաթնաժողովում, Հայաստանի վարչապետ Նիկոլ Փաշինյանը հայտարարել էր, որ պատրաստ է հոկտեմբերին ստորագրել խաղաղության պայմանագիր Ադրբեջանի հետ՝ արդեն համաձայնեցված կետերի հիման վրա և շարունակել աշխատանքը մնացած բոլոր հարցերի շուրջ։
