Սերբիայի փոխվարչապետը` BRICS-ին անդամակցելու մասին
Սերբիայի փոխվարչապետ Ալեքսանդր Վուլինը BRICS-ն անվանել է «ԵՄ-ի իրական այլընտրանք»:
«BRICS-ը գրավիչ է Սերբիայի համար, այն կմասնակցի կազմակերպության ապագա գագաթնաժողովին Կազանում և ուսումնասիրում է անդամակցության հնարավորությունը»,- ասել է երկրի փոխվարչապետը «Berliner Zeitung»-ին տված հարցազրույցում։
«Անպատասխանատու կլիներ, եթե մենք չուսումնասիրենք բոլոր տարբերակները, ներառյալ BRICS-ին անդամակցելը: Եթե BRICS երկրները գրավիչ են այլ երկրների համար, ինչպիսիք են ԱՄԷ-ն, Սաուդյան Արաբիան կամ Թուրքիան, ինչո՞ւ պետք է Սերբիան տարբերվի: Այնպես որ, կասկած չկա, որ BRICS-ը դարձել է ԵՄ-ի իրական այլընտրանք»,- ասել է նա:
Պաշտոնյան նշել է, որ եվրասկեպտիկ է դարձել «ԵՄ-ին ներսից ճանաչելուց» հետո, և որ Բրյուսելը անհնարին պայմաններ է դնում Բելգրադի համար ու երկիրը չի ընկալում որպես գործընկեր։
Ըստ Վուլինի՝ ԵՄ-ն պահանջում է Սերբիայից խզել բոլոր կապերը Ռուսաստանի հետ՝ միության մաս դառնալու համար, մինչդեռ նախագահ Վլադիմիր Պուտինը նման պայմաններ չի առաջ քաշել։
