Ո՞վ է հրազենային կրակոցից մահացած զինծառայողը. 24News

Մեղրիում հրազենային կրակոցից մահացած զինծառայող Աղասի Դալլաքյանը Շիրակի մարզի Բասեն գյուղից էր, 9 ամիս առաջ էր զորակոչվել բանակ: Այս մասին 24News-ին հայտնել է Բասեն համայնքի վարչական ղեկավար Հայկ Մնացյանը:

«18 տարեկան, մոտ 8-9 ամսվա ծառայող, Մեղրիում էր ծառայում: Իրենց ընտանիքը շատ լավ ընտանիք է` հարգված, սիրված, ինքն էլ շատ խելոք, գյուղի մեջ միշտ հարգանք դրսևորած երեխա է եղել»,- պատմել է ղեկավարը:

Մնացյանի խոսքով, շատ աշխատասեր տղա էր. «Մինչ բանակ զորակոչվելը աշխատում էր` գյուղատնտեսությամբ էր զբաղվում»: Աղասին տան ավագ զավակն էր, իրենից փոքր դպրոցահասակ եղբայր ունի:

Մնացյանը նշել է, որ տեղյակ չէ, թե ինչ հանգամանքներում է դեպքը տեղի ունեցել:

Հիշեցնենք, որ հոկտեմբերի 13-ին՝ ժամը 09:30-ի սահմաններում, հայտնաբերվել է ՊՆ N զորամասի զինծառայող Աղասի Սերոժի Դալլաքյանի դին՝ հրազենային վնասվածքով: Այս մասին հայտնել է ՀՀ ՊՆ-ը: