Հասկանալի է, որ սա չի կարող Հայաստանի համար ընդունելի լինել. Փաշինյան

Ադրբեջանի ընկալումները, իմ տպավորությամբ, հետևյալն են, որ «Խաղաղության խաչմերուկ» նախագիծը Ադրբեջանին մտահոգում է նրանով, որ այս նախագիծը կարող է տասնյակ միլիարդների օգուտներ բերել ՀՀ-ին: Այս մասին «Խաղաղության խաչմերուկ. միավորելով անվտանգությունն ու ժողովրդավարությունը» համաժողովին հայտարարեց վարչապետ Նիկոլ Փաշինյանը:

«Այս փաստը պոտենցիալ 2 մտահոգություն կարող է բերել Ադրբեջանին: Առաջինը՝ եթե Ադրբեջանը անկեղծ մտածում է, որ ռազմավարական հեռանկարում Հայաստանը ագրեսիվ պլաններ ունի Ադրբեջանի նկատմամբ, դա կարող է ստեղծել ընկալումներ, որ այդ տասնյակ միլիարդ դոլարները կարող են օգտագործվել ընդդեմ Ադրբջանի: Բայց կա նաև հակադարձը, որ եթե Ադրբեջանը ագրեսիվ մտադրություններ ունի Հայաստանի նկատմամբ, դա կարող է մտահոգել Ադրբեջանին, որ այդ տասնյակ միլիարդ դոլարները կարող են օգտագործվել Հայաստանի պաշպանունակությունը բարձրացնելու համար, և Ադրբեջանը իր ագրեսիվ պլանները Հյաաստանի նկատմամբ իրագործելու խնդիրներ կարող է ունենալ»,-ասաց վարչապետը:

Փաշինյանի խոսքով՝ եթե Ադրբեջանի մտահոգությունը առաջինն է, դա փարատելի մտահոգություն է, որովհետև Հայաստանն ըստ էության բարձրագույն մակարդակով իր իրականացրած քաղաքականություններով և ռազմավարական քաղաքականություններով արձանագրում է, որ մենք որևէ ագրեսիվ նկատառում Ադրբեջանի նկատմամբ և ընդհանրապես տարածաշրջանի երկրների նկատմամբ չունենք: Մենք ճանաչում ենք մեր բոլոր հարևանների տարածքային ամբողջականությունը և պատրաստ ենք դրա վերաբերյալ դե յուրե պարտավորություններ ստանձնել:

«Փաստն այն է, որ Ադրբեջանը իր այսօրվա խոսույթով ուզում է, որ Հայաստանի ճանապարհներն օգտագործեի լինեն իր համար, բայց Հյաստանը շարունակի մնալ բլոկադայի մեջ: Հասկանալի է, որ սա չի կարող Հայաստանի համար ընդունելի լինել»,-ասաց Փաշինյանը: