Ադրբեջանը ՀՀ-ի դեմ կիրառում է ուժի սպառնալիքի քաղաքականությունը. Հայրապետյան

Ադրբեջանագետ Տաթևիկ Հայրապետյանը ֆեյսբուքյան իր էջում գրում է. «Ադրբեջանի պաշտպանության նախարարության ղեկավար Զաքիր Հասանովը հրավիրել է ադրբեջանական բանակի ղեկավարությանը օպերատիվ իրավիճակը վերլուծելու համար։

Տարածված մամուլի հաղորդագրության համաձայն՝ «Տրվել են համապատասխան հանձնարարականներ զորքերի մարտունակությունը բարձր մակարդակի մշտական ​​պահպանման, ինչպես նաև պայմանական սահմանին ռևանշիստական ​​ուժերի բոլոր հնարավոր սադրանքների դեմ կանխարգելիչ միջոցներ ձեռնարկելու պատրաստակամության վերաբերյալ»։

Իմ դիտարկմամբ՝ Ադրբեջանը շատ բացահայտ կերպով ՀՀ-ի դեմ կիրառում է ուժի սպառնալիքի քաղաքականությունը։

Այն պարագայում, երբ Փաշինյանի իշխանությունն արել է ամեն հնարավոր ու անհնարին զիջում Ադրբեջանին՝ մի թղթի կտոր պոկելու ակնկալիքով, Ադրբեջանը փորձում է թե՛ քարոզչական, թե՛ քաղաքական ու դիվանագիտական գործիքակազմով անհնար դարձնել որևէ թղթի ստորագրում, քանի որ Ալիևին շատ հարմար է գործընթացը, որի շրջանակներում ինքը ստանում է առավելագույնը՝ դիմացը չտալով ոչինչ։ Իսկ Փաշինյանին մեջ «ռևանշիստ» տեսնելու համար, իհարկե, առանձնահատուկ երևակայություն է պետք․․․»,- ասել է նա:

Հիշեցնենք, որ այսօր Ադրբեջանի պաշտպանության նախարարությունում պաշտպանության նախարար Զաքիր Հասանովի գլխավորությամբ տեղի է ունեցել ծառայողական խորհրդակցություն: