Իրանն Անվտանգության խորհրդի արտահերթ նիստ է պահանջել
Իրանը պահանջում է ՄԱԿ-ի Անվտանգության խորհրդին արտահերթ նիստ գումարել՝ կապված Բեյրութի ուղղությամբ Իսրայելի հարձակումների հետ: Իրանն Անվտանգության խորհրդի արտահերթ նիստ է պահանջել Լիբանանում Իսրայելի «ագրեսիայի» խնդիրը լուծելու համար:
ՄԱԿ-ի գլխավոր քարտուղարին և Անվտանգության խորհրդի նախագահին ուղղված նամակում Իրանը դիմել է խորհրդին՝ խնդրելով արտակարգ նիստ անցկացնել՝ Լիբանանում և ամբողջ տարածաշրջանում «իսրայելական ռեժիմի ահաբեկչական ագրեսիան և այդ ռազմատենչ ռեժիմի շարունակական հանցագործությունները» դիտարկելու համար:
«Իրանի Իսլամական Հանրապետությունն ամենավճռական կերպով դատապարտում է այդ վախկոտ ագրեսիվ գործողությունները։ Հաշվի առնելով տարածաշրջանային խաղաղության և անվտանգության համար ծանր հետևանքները՝ Իրանի Իսլամական Հանրապետությունը կոչ է անում Անվտանգության խորհրդին անվերապահորեն դատապարտել Իսրայելի գործողությունները և արտակարգ նիստ անցկացնել՝ Լիբանանում և տարածաշրջանում իսրայելական ռեժիմի ահաբեկչական ագրեսիային պատասխան տալու համար», - ասվում է նամակի տեքստում, որը լրագրողներին է տրամադրել իրանական դիվանագիտական առաքելությունը: Բացի այդ, Իրանը Անվտանգության խորհրդին կոչ է անում շտապ և վճռական միջոցներ ձեռնարկել՝ դադարեցնելու շարունակվող իսրայելական ագրեսիան և կանխելու տարածաշրջանի ներքաշումը լայնամասշտաբ պատերազմի մեջ»։
Սեպտեմբերի 23-ին Իսրայելը սկսել է զանգվածային ավիահարվածներ հասցնել Լիբանանում շիական «Հեզբոլլահ» շարժման ռազմական օբյեկտներին: Բեյրութում սեպտեմբերի 27-ին սպանվել է շարժման գլխավոր քարտուղար Հասան Նասրուլլան: Սեպտեմբերի 28-ին «Հեզբոլլահ»- ը պաշտոնապես հաստատեց նրա մահը: Ամերիկյան ABC հեռուստաընկերությունը սեպտեմբերի 28-ին, հղում անելով իր աղբյուրներին, հայտնել էր, որ Իսրայելը ծրագրում է Լիբանանում ցամաքային սահմանափակ գործողություն իրականացնել:
