Իրանի նախագահ Մասուդ Փեզեշքիանը Լիբանանում փեյջերների վերջին պայթյունները խայտառակություն է անվանել արևմտյան երկրների համար, ինչպես նաև այդ միջադեպերն ապացույց է համարել, որ ԱՄՆ-ն աջակցում է Իսրայելի «սպանություններին և հանցագործություններին»:

Երեկ և այսօր Լիբանանի տարբեր շրջաններում փեյջերների պայթյուն է տեղի ունեցել։ Լիբանանի առողջապահության նախարար Ֆիրաս Աբյադը հայտարարել է, որ փեյջերների պայթեցման հետևանքով վիրավորվել է մինչև 2,8 հազար մարդ, զոհերի թիվը հասել է 12-ի: Առայժմ հայտնի չէ, թե ինչն է տասնյակ սարքերի միաժամանակյա պայթեցման պատճառ դարձել։

«Նման միջադեպը խայտառակություն է արևմտյան երկրների, հատկապես ԱՄՆ –ի համար, որոնք ոչնչի առաջ կանգ չեն առնի իրենց անմարդկային նպատակներին հասնելու համար», - Փեզեշքիանի խոսքերն է մեջբերում իրանական պետական IRNA գործակալությունը:

Նա նաև նշել է, որ նման միջադեպերը վկայում են այն մասին, որ Վաշինգտոնը աջակցում է Թել Ավիվին իր բոլոր «սպանություններում և հանցագործություններում»:

Մի շարք ԶԼՄ-ների տվյալներով՝ փեյջերները «Հըզբոլլահ» շարժման անդամների կողմից օգտագործվում են որպես կապի փակ համակարգ, որն ամենաքիչն է հակված կոտրվելու և գաղտնալսվելու: Առայժմ հայտնի չէ, թե ինչն է տասնյակ սարքերի միաժամանակյա պայթեցման պատճառ դարձել։ «Հըզբոլլահն» ու Լիբանանի իշխանությունները կատարվածի պատասխանատվությունը դրել են Իսրայելի վրա։