ՀԱՊԿ-ը սպառնալիք է Հայաստանի անվտանգությանն ու ինքնիշխանությանը. Փաշինյան

«Մենք ՀԱՊԿ–ում մեր անդամակցությունը սառեցրել ենք ոչ միայն այն պատճառով, որ ՀԱՊԿ–ը չի ապահովում ՀՀ նկատմամբ անվտանգային պարտավորությունները, այլև այն պատճառով, որ ՀԱՊԿ–ը ստեղծում է սպառնալիքներ ՀՀ անվտանգության, Հայաստանի հետագա գոյության, ինքնիշխանության և պետականության համար»:

Այս մասին ասաց ՀՀ վարչապետ Նիկոլ Փաշինյանը Համաշխարհային հայկական գագաթնաժողովի ժամանակ, որի ընթացքում քննարկում է տեղի ունենում Հայաստանի ներքին և արտաքին անվտանգությունը թեմայով:

ՀԱՊԿ–ում գործունեությունը վերականգնելու հնարավորությանն անդրադառնալով՝ նա ասել է, որ գործունեությունը լիարժեք կվերականգնի միայ այն պարագայում, երբ Հայաստանի բարձրաձայնած հարցերին հնչեն կոնկրետ պատասխաններ․ «Մեր շեշտադրումից անցել է ուղիղ 2 տարի․ այլևս ակնհայտ է, որ չեն էլ հնչելու, և որքան այդ պատասխանները չեն հնչում ու համոզիչ չեն, ամեն րոպե, ամեն վայրկյան Հայաստանն ավելի է հեռանում ՀԱՊԿ-ից»։ Ըստ նրա՝ Հայաստանը դեռ չի անցել անդառնալիության կետը, բայց մեծ է հավանականությունը, որ այս իրավիճակի շարունակության դեպքում կանցնի։