Բորելը հայտարարել է Ուկրաինա այցելելու իր մտադրության մասին՝ նախքան ԵՄ դիվանագիտության ղեկավարի իր մանդատի ավարտը

Ժոզեպ Բորելը հայտարարել է Ուկրաինա այցելելու իր մտադրության մասին՝ նախքան ԵՄ դիվանագիտության ղեկավարի իր մանդատի ավարտը, երբ այդ պաշտոնը կզբաղեցնի Էստոնիայի նախկին վարչապետ Կայա Կալլասը։

ԵՄ դիվանագիտության ղեկավարն իր բլոգում գրառում է կատարել՝ հրաժեշտ տալով Ուկրաինայի ԱԳՆ նախկին ղեկավար Դմիտրի Կուլեբային։

Նա հայտնել է, որ ընդամենը մի քանի օր առաջ հեռախոսազրույց է ունեցել Ուկրաինայի ԱԳՆ նոր ղեկավար Անդրեյ Սիբիգայի հետ։

«Փորձառու դիվանագետը նախագահ Զելենսկիի և նախարար Կուլեբայի օրոք տարբեր պաշտոններ է զբաղեցրել։ Առաջիկա ամիսները որոշիչ կլինեն պատերազմի ընթացքի համար։ Կարևոր է ուկրաինական դիվանագիտության ղեկին կանգնած լինի այնպիսի փորձառու պաշտոնյա, ինչպիսին նախարար Սիբիգան է, որպեսզի շարունակի ապահովել Ուկրաինային միջազգային աջակցությունը՝ սկսած ՄԱԿ-ից։

Ընդամենը մի քանի օր առաջ ունեցանք մեր առաջին հեռախոսազրույցը։ Ես նրան փոխանցեցի նաև իմ բաց հրավերը՝ մասնակցելու ԵՄ արտաքին հարաբերությունների խորհրդին, որին Դմիտրին ամեն անգամ մասնակցել է Ռուսաստանի լայնամասշտաբ ներխուժումը սկսվելուց հետո։ Ցավոք, կարևոր օգնությունը, որը մենք արդեն տրամադրել ենք Ուկրաինային, դեռևս բավարար չէ Ուկրաինայի ինքնիշխանությունը նրա ողջ տարածքում վերականգնելու և Ռուսաստանի ագրեսիվ պատերազմը դադարեցնելու համար։ Ես վստահեցրել եմ նախարար Սիբիգային, որ ԵՄ-ն կաջակցի Ուկրաինային այնքան ժամանակ, որքան անհրաժեշտ է և որքան էլ արժենա։ Մենք ուժեղացնում ենք մեր քաղաքական և ռազմական աջակցությունը Ուկրաինային։ Ուկրաինան եղել է առաջնահերթություն իմ մանդատի ողջ ընթացքում»,- նշել է Բորելը։