Մանկապարտեզի դաստիարակը հատուկ խնամքի կարիք ունեցող երեխային բռնության է ենթարկել․ նոր մանրամասներ
Երևանի թիվ 48 մանկապարտեզի դաստիարակը, որն, ըստ ծնողի, բռնություն է կիրառել իր երեխայի նկատմամբ, ազատման դիմում է գրել։ Նշվում է, որ առերեւույթ բռնության ենթարկվել էր հատուկ խնամքի կարիք ունեցող երեխա։
«Փաստինֆո»-ի հրապարակման հետքերով քաղաքային իշխանությունն ուսումնասիրություն է սկսվել։ Երևանի քաղաքապետարանից լրատվամիջոցին հայտնել էին, միջադեպը ուսումնասիրվում է Երևանի քաղաքապետարանի հանրակրթության վարչության կողմից։ Ու մինչ ուսումնասիրությունը կավարտվեր՝ դաստիարակն աշխատանքից ազատվել է։
Լրատվամիջոցը տեղեկացավ, որ պաշտոնապես նա չի ընդունել երեխայի մոր մեղադրանքները ու գրավոր ներկայացված բացատրագրում հերքել է դրանք, բայցեւ ազատման դիմում գրել։
Հիշեցնենք, որ լրատվամիջոցին ահազանգած Մաշա Մաթևոսյանը լուսանկարներ էր տրամադրել, ու պնդում էր, որ դաստիարակ Սերինե Հակոբյանը բռնություն է կիրառել իր հատուկ խնամքի կարիք ունեցող 3 տարեկան երեխայի նկատմամբ։
Մանկապարտեզի տնօրեն Մարինա Ամիրյանը երեխայի վրա վնասվածքների առկայությունը պատճառաբանել էր ինքնավնասման հետեւանք՝ նշելով, որ երեխան վնասվել է մահճակալից իջնելիս։
