Պավել Դուրովը Կրեմլի հետ որևէ բանակցություն չի ունեցել. Պեսկով

ՌԴ նախագահի մամուլի քարտուղար Դմիտրի Պեսկովը հայտնել է, որ Telegram-ի հիմնադիր Պավել Դուրովը Կրեմլի հետ երբևէ որևէ պայմանավորվածություն չի ունեցել: 

Պեսկովը նշել է, որ գործարարի և Կրեմլի միջև բանակցություններ նույնպես չեն եղել, և Պուտինն ու Դուրովը երբեք չեն հանդիպել:

«Ոչ, որքան ինձ հայտնի է, երբեք»,– ասել է նա:

Հիշեցնենք՝ Դուրովը ձերբակալվել էր Փարիզի Լե Բուրժե օդանավակայանում օգոստոսի 24–ին։ Գործարարի ձերբակալությունը բազմաթիվ երկրներում հանրային լայն քննադատության է արժանացել։ Ֆրանսիայում Դուրովին կասկածում են տասը իրավախախտումների և քրեական հանցագործությունների մեջ, այդ թվում՝ կազմակերպված խմբի կողմից անօրինական գործարքներ կատարելու նպատակով առցանց հարթակն օգտագործելուն նպաստելու մեջ։

Նրան կարող է սպառնալ մինչև 10 տարվա ազատազրկում: Դուրովին դեռ պաշտոնական մեղադրանք չի առաջադրվել։ Օգոստոսի 28–ի երեկոյան Դուրովը գրավի դիմաց ազատ է արձակվել։