Ձերբակալվել է ՌԴ պաշտպանության նախկին փոխնախարարը. ինչ է հայտնի

Պաշտպանության նախկին փոխնախարար Պավել Պոպովին 235-րդ շրջանի զինվորական դատարանը ուղարկել է քննչական մեկուսարան՝ առանձնապես խոշոր չափերով խարդախության մեղադրանքով։ Այս մասին հայտնում է Корреспондент-ը, փոխանցում է ՌԻԱ Նովոստին։

«Հետաքննության միջնորդությունը բավարարվել է, և կասկածյալ Պոպովի նկատմամբ որպես խափանման միջոց է ընտրվել կալանավորումը՝ մինչև հոկտեմբերի 29-ը»,– հրապարակել է դատարանը։

Հիշեցնենք, որ ավելի վաղ հաղորդել էինք, որ քննության տվյալներով` 2021-2024 թվականներին Պոպովը, պատասխանատու լինելով «Պատրիոտ» այգու զարգացման, սպասարկման և աշխատանքի համար, հարստանում էր այդ հաստատության հաշվին` գործելով նախկինում քրեական պատասխանատվության ենթարկված այգու տնօրեն Վյաչեսլավ Ահմեդովի և ՌԴ ՊՆ նորարարական զարգացման գլխավոր վարչության պետի տեղակալ Վլադիմիր Շեստերովի հետ համատեղ։

Պարզվել է, որ Պոպովը «Պատրիոտ» այգու հաշվին շինարարական և վերանորոգման աշխատանքներ, նյութական արժեքների մատակարարում է կազմակերպել Մերձմոսկովյան Կրասնոգորսկ շրջանումգտնվող իր հողատարածքի համար։

Բացի այդ, նա իր ենթակաների միջոցով «Պատրիոտի» հետ պայմանագրային հարաբերություններ ունեցող առևտրային կազմակերպությունների ղեկավարներին ստիպել է շինարարական և մոնտաժային աշխատանքներ իրականացնել քաղաքից դուրս գտնվող իր այդ առանձնատանը` առանց դրա դիմաց վճարելու։

Տան կառուցումից և հողատարածքի բարեկարգումից հետո Պոպովը շարունակել է իր շուրջ 3 հա մակերեսով հողամասի տեխնիկական և տնտեսական սպասարկումն ապահովել այգու հաշվին։