Անհետևանք չի մնա․ Պեսկովը մեկնաբանել է Բորելի հայտարարությունը

Ռուսական ակտիվներից եկամուտների փոխանցումն Ուկրաինա անօրինական է և Եվրամիության համար անհետևանք չի մնա։ Այս մասին՝ մեկնաբանելով Եվրամիության արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելի հայտարարությունը, լրագրողների հետ զրույցում ասել է ՌԴ նախագահի մամուլի քարտուղար Դմիտրի Պեսկովը։

«Դրանք անօրինական գործողություններ են և անպայման կունենան իրավական հետևանքներ։ Սա ոչ այլ ինչ է, քան ապօրինի սեփականազրկում, ռուսերեն ասած՝ մեր փողերի, մեր ունեցվածքի գողություն», - նշել է դիվանագետը:

Հիշեցնենք՝ ավելի վաղ Բորելը ասել էր, որ Բրյուսելը ռուսական սառեցված ակտիվներից ստացված եկամուտներից 1,4 մլրդ եվրո է ուղարկել Ուկրաինային, ինչպես նաև ԵՄ պետություններին որպես փոխհատուցում Կիևին զենքի մատակարարումների համար։

«Մենք արդեն սկսել ենք օգտագործել ռուսական սառեցված ակտիվներից ստացված եկամուտները: 1,4 մլրդ եվրո ուղարկվել է Ուկրաինա և ԵՄ պետություններինզենքի մատակարարումների համար», - ասել է Բորելը։

ՆԱ հավելել է, որ ԵՄ-ն փոխել է Կիևին օգնելու տրամաբանությունը։ Եթե նախկինում միությունը փոխհատուցում էր երկրներին արդեն վճարված մատակարարումների համար, ապա այժմ այն անցնում է նախնական ֆինանսավորմանը ռուսական սառեցված ակտիվներից ստացված եկամուտներից։