Եվրամիությունը դատապարտել է Ադրբեջանի վարքագիծը
Ադրբեջանում Եվրամիության պատվիրակությունը լիովին հերքում է վերջերս որոշ կայքերի հնչեցրած մեղադրանքները՝ ԵՄ ներկայացուցիչների և ադրբեջանական քաղաքական կուսակցությունների միջև հանդիպումների առնչությամբ։ Ինչպես նշվում է հայտարարության մեջ, նշված մեղադրանքները լիովին կեղծ են և իրականությանը չեն համապատասխանում։
«Ցավում ենք և խստորեն դատապարտում ենք Եվրամիության դեմ նման ապատեղեկատվական հարձակումները։
ԵՄ-ն աջակցում է Ադրբեջանի ինքնիշխանությանը, անկախությանը և տարածքային ամբողջականությանը։ ԵՄ-ն եղել և մնում է Ադրբեջանի կարևոր և սերտ գործընկերը, այդ թվում՝ նրա կարևորագույն առևտրային և ռազմավարական գործընկերը էներգետիկայի ոլորտում։
ԵՄ-ն աշխատում է Ադրբեջանի հետ՝ ի շահ նրա ժողովրդի, ներառյալ՝ մարդու իրավունքների պաշտպանության առնչությամբ, և կապեր է պահպանում ադրբեջանական հասարակության բոլոր հատվածների, դրանց թվում՝ քաղաքական կուսակցությունների և քաղաքացիական հասարակության հետ: ԵՄ-ն ոչ մի երկրում չի միջամտում ընտրություններին»,- ասված է հայտարարության մեջ։
