ԼԳԲՏ-ի «քարոզչությունը» դպրոցներում արգելող օրենքը ԵԽ-ից Բուլղարիայի նախագահին կոչ են անում չստորագրել
Եվրոպայի խորհրդի մարդու իրավունքների հանձնակատար Մայքլ Օ'Ֆլաերտին կոչ է արել Բուլղարիայի նախագահ Ռումեն Ռադևին չստորագրել օրենքը, որն արգելում է ԼԳԲՏ-ի «քարոզչությունը» դպրոցներում։
«Իշխանությունները պետք է պայքարեն ԼԳԲՏԻ անձանց նկատմամբ խտրականության և թշնամական հռետորաբանության դեմ, այդ թվում՝ ընտրությունների նախաշեմին», - X-ում գրել է է Օ'Ֆլաերտին՝ հավելելով, որ ինքը «խորապես մտահոգված է» բուլղարացի օրենսդիրների կողմից ընդունված օրենսդրական փոփոխություններով։
Օրեր առաջ խորհրդարանն օրենք ընդունեց, ըստ որի արգելվում է կրթական համակարգում «ոչ ավանդական սեռական կողմնորոշման հետ կապված գաղափարների և տեսակետների քարոզչությունը»: Ակտիվիստները Ռադևին կոչ են արել վետո դնել օրենքի վրա, սակայն նա դեռ իր մտադրությունների մասին չի հայտարարել։
