Ռուսաստանը հույս ունի, որ Իրանի նախագահը կշարունակի հետեւել Ռայիսիի քաղաքական գծին

Ռուսաստանը ելնում է նրանից, որ անցած շաբաթ Իրանի նախագահ ընտրված Մասուդ Պեզեշքիանը կշարունակի հետևել այն կուրսին, որը նախանշել էր իր նախորդի՝ Էբրահիմ Ռաիսիի կառավարությունը: Այդ մասին ՌԻԱ Նովոստիին տված հարցազրույցում հայտարարել է Իրանում ՌԴ դեսպան Ալեքսեյ Դեդովը: 

«Ընդհանուր առմամբ, մենք ելնում ենք նրանից, որ նախագահ Ռաիսիի կառավարության գլխավոր ռազմավարական կուրսը կպահպանվի նաեւ պարոն Պեզեշկյանի կառավարության օրոք», - ասել է դեսպանը: Դեդովը հույս է հայտնել, որ «տեսանելի ապագայում» կստորագրվի համապարփակ ռազմավարական գործընկերության մասին պայմանագիր, «որի վրա աշխատանքը գտնվում է վերջնագծում»: «Ինչ վերաբերում է մյուս ասպեկտներին, - նշել է նա, - կարծում եմ, որ հարաբերությունները կզարգանան այն կուրսին համապատասխան, որը նախանշել է Նախագահ Ռաիսիի կառավարությունը»:

Ռուսաստանի նախագահ Վլադիմիր Պուտինը և Իրանի նորընտիր նախագահ Մասուդ Պեզեշքիանը հուլիսի 8-ին հեռախոսազրույց են ունեցել, որի ընթացքում ՌԴ նախագահը շնորհավորել է իր իրանցի գործընկերոջը ընտրություններում տարած հաղթանակի կապակցությամբ: ISNA գործակալությունը հայտնել է, որ Պեզեշքիանը զրույցի ընթացքում հայտարարել է BRICS-ի գագաթնաժողովի շրջանակներում համապարփակ պայմանագիր կնքելու պատրաստակամության մասին, որը տեղի կունենա Կազանում հոկտեմբերին:

Իրանի ընտրական հանձնաժողովի ղեկավար Մոհսեն Էսլամին հուլիսի 7-ին հայտարարել է, որ բարեփոխիչ քաղաքական գործիչ Մասուդ Պեզեշքիանը հաղթել է Իրանի արտահերթ նախագահական ընտրությունների երկրորդ փուլում՝ հավաքելով 16 384 403 ձայն:

Նրա մրցակիցը՝ պահպանողական թևի ներկայացուցիչ Սաիդ Ջալիլին, ստացել է 13 538 179 ձայն։ Էսլամիի խոսքով՝ ընդհանուր հաշվարկվել է 30 573 931 ձայն, մասնակցությունը կազմել Է ընտրողների 49,8 տոկոսը: