Մի քանի արկածախնդիրներ փորձել են մի քիչ ճարպիկություն անել․ Գասպարյան

ՀՀ նախկին ոստիկանապետ Վլադիմիր Գասպարյանը լրագրողների հետ ճեպազրույցում հայտարարել է, թե դատավճռի կապակցությամբ կարծիք կհայտնի ծանոթանալուց հետո։ Գասպարյանը չի հստակեցրել՝ կբողոքարկեն դատավճիռը, թե ոչ։

«Դատավճիռը կլինի մեր ձեռքում, կծանոթանանք, ըստ այնմ, լուծումը կտանք։ Իհարկե, ես գնալու եմ արդարացման ճանապարհով»,- ասել է նա։

Հարցին՝ սպասում էր դատարանի նման վճռի, Գասպարյանն ասել է. «Ես միշտ ամեն ինչ սպասում եմ»։

Հարցին՝ քաղաքական հետապնդում տեսնում է այս ամենի մեջ, նա ասել է. «Չէ, քաղաքական հետապնդում չի եղել, բայց մի քանի արկածախնդիրներ, դուր գալու համար ղեկավարներին, փորձել են մի քիչ ճարպիկություն անել»։

Նախկին ոստիկանապետ Վալերի Օսիպյանի մասին հարցին ի պատասխան էլ նա ասել է. «Հանգուցյալների մասին չենք խոսում, անցնենք առաջ»։

Գասպարյանը նաև անդրադարձել է 2018թ. իրադարձություններին՝ ասելով. «Օսիպյանը մեր կապավորնա եղել, իրան ասվելա էն, ինչ որ պետքա ինքը լսի ու գնա փոխանցի»

Հիշեցնենք՝ Վլադիմիր Գասպարյանը դատապարտվեց 6 տարի ժամկետով ազատազրկման, սակայն ազատվեց պատժի կրումից։