Տարածաշրջանին ռազմական բլոկներ պետք չեն, որոնք հրահրում են նոր սառը պատերազմ․ Չինաստանի ԱԳՆ

Ասիա-Խաղաղօվկիանոսյան տարածաշրջանին ռազմական բլոկներ պետք չեն, երկու երկրների միջեւ փոխգործակցությունը չպետք է վնասի երրորդ կողմերի շահերին,  ճեպազրույցի ժամանակ հայտարարել է ՉԺՀ ԱԳՆ պաշտոնական ներկայացուցիչ Լին Ցզյանը՝ մեկնաբանելով Ֆիլիպինների եւ Ճապոնիայի պաշտպանական դաշնագիրը:

Ավելի վաղ Ֆիլիպինյան GMA գործակալությունը հայտնել էր, որ Ֆիլիպիններն ու Ճապոնիան պաշտպանական դաշնագիր են ստորագրել, որը թույլ կտա երկրներին զորքեր տեղակայել միմյանց տարածքում՝ համատեղ զորավարժությունների եւ հումանիտար գործողությունների համար:

«Երկրների միջև փոխգործակցությունը և համագործակցությունը չպետք է վնաս հասցնի տարածաշրջանի երկրների միջև փոխըմբռնմանը և վստահությանը, չպետք է ոչնչացնի տարածաշրջանային խաղաղությունն ու կայունությունը, չպետք է ուղղված լինի երրորդ կողմերի դեմ կամ վնասի երրորդ կողմերի շահերին», - ասել է Լին Ցզյանը։

Նա ընդգծել է, որ «Ասիա-Խաղաղօվկիանոսյան տարածաշրջանին ռազմական բլոկներ պետք չեն, առավել եւս՝ փոքր շրջանակներ, որոնք հրահրում են բլոկային առճակատում եւ նոր սառը պատերազմի առաջացում»:

«Ցանկացած գործողություն, որը ոչնչացնում է տարածաշրջանում խաղաղությունն ու կայունությունը, ոչնչացնում է տարածաշրջանում համախմբվածությունն ու համագործակցությունը, կհանգեցնի տարածաշրջանի ժողովուրդների զգուշավորությանն ու համատեղ հակազդեցությանը», - ասել Է դիվանագետը:

Նա հայտարարել է, որ Ճապոնիան պետք է վերաիմաստավորի իր ագրեսիայի պատմությունը և զգույշ գործի ռազմական անվտանգության հարցերում: