Ոստիկանների գործողություններից վիրավորված քաղաքացիներին դատաբժիշկ չի այցելել, փորձում են կոծկել․ Բագրատ Սրբազան
Ժողովրդին կոչ եմ արել հանդարտվելու, որովհետև լավ էի հասկանում, որ թիկունքում արդեն գնդակներով զինված զորքեր էին կանգնած․ ասել է Բագրատ արքեպիսկոպոս Գալստանյանը` Բաղրամյան պողոտայում մեկնարկող հավաքի ընթացքում։
Նրա խոսքով՝ այդ իրավիճակի մեջ էլ իրենց գործած ամբողջ բռնությունների դիմաց մոտ երեսուն ռումբ է նետվել ժողովրդի վրա, որոնք արդեն ինչպես պարզ է դարձել. ժամկետանց էին:
«Ոստիկանները կիրառել են միջոցներ, որոնք անթույլատրելի են եղել: Մեզ այս շենքերը հետաքրքիր չեն, ես դա բազմիցս ասել եմ, այդ շենքերում գործող մարդիկ պետք է գան ու պատասխան տան: Մեր նպատակը եղել է շրջափակել ու չթողնել, որ մարդիկ, հանգիստ գնան իրենց սև գործը կատարելու»,-ասել է Սրբազանը:
Նա նաև նշել է, որ մինչև երեկ գիշերը ոստիկանության գործողություններից վիրավորում ստացած քաղաքացիներին դատաբժիշկ չի այցելել։
«Իրենք ամեն գնով փորձում են տեղի ունեցածը կոծկել։ Բայց բռնություն գործածներից բոլորի դեմքերը նույնականացված են և մենք սկսելու ենք իրավական գործընթաց»,-տեղեկացրել է Սրբազանը:
