Դա տեղի չի ունենա այս շաբաթավերջին. Պետեր Սիյարտո
Շվեյցարիայում Ուկրաինայի հարցով խորհրդաժողովը չի կարող հասնել իր նպատակին, քանի որ դրանում Ռուսաստանը ներկայացված չէ։ Այս մասին հայտարարել է Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն:
Նա ևս Բուրգենստոկ հանգստավայրում մասնակցում է Ուկրաինային նվիրված համաժողովին։
«Խաղաղություն հաստատելու Շվեյցարիայի ջանքերը միշտ բարձր են գնահատվել և շարունակում են գնահատվել: Բայց, անկեղծ ասած, խաղաղության համաժողովը կարող է հասնել իր նպատակին միայն այն դեպքում, եթե երկու հակամարտող կողմերը լինեն բանակցությունների սեղանի շուրջ: Դա տեղի չի ունենա այս շաբաթավերջին»,- ասել է արտգործնախարարը:
Նա նշել է, որ Հունգարիան շարունակում է կոչ անել «իրական, առարկայական խաղաղության բանակցություններ անցկացնել նրանց միջև, ովքեր պատերազմ են մղում»։
«Միջազգային հանրությունը պետք է ստիպի պատերազմող կողմերին վերջապես համաձայնել հրադադարի և նստել բանակցությունների սեղանի շուրջ», – ասել է Սիյարտոն:
