Ուկրաինայի հարցով բանակցություններին անհրաժեշտ է ՌԴ մասնակցությունը. Սաուդյան Արաբիայի ԱԳՆ
Ուկրաինայում իրավիճակի կարգավորման ցանկացած խաղաղ գործընթաց պահանջում է Ռուսաստանի մասնակցությունը, հայտարարել է Սաուդյան Արաբիայի արտգործնախարար արքայազն Ֆեյսալ բեն Ֆարհան Ալ Սաուդը։
«Մենք կարծում ենք, որ կարևոր է, որ միջազգային հանրությունը խրախուսի ցանկացած քայլ դեպի լուրջ բանակցություններ... Ցանկացած վստահելի գործընթացի համար անհրաժեշտ կլինի Ռուսաստանի մասնակցությունը։ Հուսով ենք, որ գագաթնաժողովի արդյունքները կարտացոլեն այդ նպատակները»,- նրա խոսքերն է մեջբերում ՏԱՍՍ-ը։
Նախարարի խոսքով, երկիրը պատրաստ է աջակցել հակամարտությանը վերջ տալու ուղղությամբ գործադրվող ջանքերին։
Ավելի վաղ Շվեյցարիայի նախագահ Վիոլա Ամհերդը հայտարարել էր, որ Ուկրաինայի համար խաղաղ գործընթացը առանց Ռուսաստանի անհնար է պատկերացնել։
Թուրքիայի արտգործնախարար Հաքան Ֆիդանը, ելույթ ունենալով Բյուրգենշտոկում կայացած գագաթնաժողովում, նշել է, որ Շվեյցարիայի խորհրդաժողովը կարող է ավելի արդյունավետ լինել Ռուսաստանի մասնակցությամբ։
