Էրդողանը դիմել է ԱՄՆ-ին և Արևմուտքի երկրներին
Միացյալ Նահանգները և արևմտյան երկրները պետք է ճնշում գործադրեն Իսրայելի վրա՝ իրականացնելու Գազայի հատվածում հրադադարի մասին ՄԱԿ-ի Անվտանգության խորհրդի բանաձևը: Այս մասին հայտնել է Թուրքիայի նախագահ Ռեջեփ Թայիփ Էրդողանը Իսպանիայի կառավարության ղեկավար Պեդրո Սանչեսի հետ բանակցություններից հետո, փոխանցում է TRT Haber-ը։
Էրդողանը հույս է հայտնել, որ Իսրայելը կհրաժարվի Գազայի հատվածում հարձակումներից և կգա համաձայնության, որը կայուն խաղաղություն կապահովի տարածաշրջանում: Նա ընդգծել է, որ Թուրքիան ուշադիր հետևելու է բանաձևի կատարմանը։
Հունիսի 13-ի առավոտյան պաղեստինյան ՀԱՄԱՍ արմատական շարժումը հայտարարել է, որ դրական է արձագանքել Գազայի հատվածում հրադադարի և պատանդների ազատ արձակման վերաբերյալ վերջին առաջարկին, որը հնչեցրել Է ԱՄՆ նախագահ Ջո Բայդենը:
Հունիսի 12-ին ԱՄՆ պետքարտուղար Էնթոնի Բլինքենը հայտարարել էր, որ ՀԱՄԱՍ-ի պատասխանը Վաշինգտոնի հրադադարի առաջարկին փոփոխություններ է պարունակում:
Մինչ այդ Bloomberg գործակալությունը գրել էր, որ Մեծ յոթնյակի (G7) երկրների ղեկավարները ՀԱՄԱՍ-ին կոչ են անելու ընդունել Իսրայելի հետ հրադադարի մասին համաձայնագիրը:
