ՏԵՍԱՆՅՈՒԹ․ Զիջումների մասին խոսակցությունները համարում եմ կատարելապես անընդունելի․ Նիկոլ Փաշինյան

ԱԺ-ում վարչապետ Նիկոլ Փաշինյանը հայտարարեց, որ զիջումների մասին խոսակցությունները համարում է կատարելապես անընդունելի։ 

«Եթե վերարտադրվում է ՀՀ պետական սահման, դա զիջում անվանելը առնվազն տրամաբանական չէ, ես դա կհամարեի հաջողություն, որովհետև Հայաստանն իր պատմության մեջ առաջին անգամ բանակցային եղանակով վերարտադրում է սահման ու դնում է ՀՀ պետականության, ինքնիշխանության ու անկախության հետագա զարգացման համար կարևորագույն անկյունաքար», - ասաց Փաշինյանը։ 

Վարչապետի խոսքով՝ սահմանն անցնում է այնտեղով, որտեղով անցնում է սկզբունքը:

«Ուզում եմ ընդգծել, որ սահմանազատման գործընթացի արդյունքում ՀՀ ինքնիշխան տարածքի որևէ միլիմետր չի թողնվել ուրիշին, ՀՀ ինքնիշան տարածքն ամբողջությամբ արձանագրված է սահմանազատվող հատվածներում», - ասաց նա։

Վարչապետը նշեց, որ սահմանազատաման գործընթացի վերաբերյալ որոշում կայացնելուց առաջ կառավարությունում տեղի են ունեցել տասնյակ քննարկումներ:

Նիկոլ Փաշինյանն ասաց․ «Մեր որոշումներն անցել են իրավական փորձաքննություն, թե ինչքանով են մեր արձանագրված որոշումները հիմնավորված, ես որևէ կասկած չունեմ այդ որոշումների իրավական հիմնավորված լինելու մեջ»։