ՏԵՍԱՆՅՈՒԹ. «Խոշոր շինարարական ընկերություններին հորդորում ենք մասնակցել մրցույթին». Ավինյան

Բագրատունյաց 48/1 հասցեում նախատեսվում է կառուցել բարձրագույն վարպետության համալիր մարզադպրոց. այս մասին այսօր Երևանի քաղաքապետարանի գործակարգավարական խորհրդակցությանը զեկուցեց քաղաքապետի տեղակալ Արմեն Փամբուխչյանը։

«Այն լինելու է բազմաֆունկցիոնալ, որտեղ կանցկացվեն, ոչ միայն մենապայքարային, այլ նաև տարբեր մրցաշարեր։ Մարզադպրոցի նախագիծը պատրաստ է, բացակայում է միայն ՀԷՑ-ի տեխնիկական պայմանների համաձայնեցումը։ Այն ներկայացվելուց հետո փաթեթը կներկայացվի պարզ փորձաքննության։ Դրական եզրակացություն ստանալու դեպքում կուղարկվի համալիր փորձաքննության, այնուհետև կդրվի շինարարական մրցույթի»,- ասաց նա։

Տիգրան Ավինյանն էլ ասաց, որ մարզադպրոցի կառուցումը շատ կարևոր է Երևանի համար.

«Պլանավորում ենք նոր շենքում անցկացնել աշխարհի առաջնությունը: Ընդամենը 2 տարի ունենք շինարարությունն ավարտելու համար, խոշոր շինարարական ընկերություններին հորդորում ենք մասնակցել մրցույթին»։