Ադրբեջանի և Հայաստանի միջև խաղաղության պայմանագրի ստորագրման իրական և եզակի հնարավորություն է ստեղծվել։ Այդ մասին Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը հայտարարել է բրիտանական BBC պարբերականին տված հարցազրույցում:

Էլչին Ամիրբեկովի խոսքով՝ Ադրբեջանն ու Հայաստանն այսօր ավելի մոտ են խաղաղությանը, քան երբևէ:

Նա դրական է գնահատել Ադրբեջանի Հանրապետության և Հայաստանի Հանրապետության միջև պետական սահմանի դելիմիտացիայի պետական հանձնաժողովի և Հայաստանի Հանրապետության և Ադրբեջանի Հանրապետության միջև պետական սահմանի դելիմիտացիայի և սահմանային անվտանգության հարցերով հանձնաժողովի միջև վերջին համաձայնագիրը և Ղազախի շրջանի չորս սահմանամերձ գյուղերի վերադարձն Ադրբեջանին և հավելել, որ այդպիսով Ադրբեջանն ու Հայաստանը սկսել են դե ֆակտո սահմանազատման գործընթացը:

Ամիրբեկովը հավելել է, որ տվյալ համաձայնությունը (դելիմիտացիային վերաբերող) ձեռք է բերվել կողմերի անմիջական շփման արդյունքում՝ երկկողմ հիմունքներով և առանց որևէ երրորդ կողմի մասնակցության։

«Դա ցուցիչ է այն բանի, որ մենք կարող ենք ինքներս լուծել խնդիրները»,- ասել է նա:

Էլչին Ամիրբեկովն ասել է, որ մինչ օրս մնում են չլուծված հարցեր:

«Ազգային օրենսդրության մեջ, Հայաստանի Սահմանադրության մեջ պետք է փոփոխություններ կատարվեն, քանի որ ներկայիս տարբերակում հաստատվում է, որ Ղարաբաղը Հայաստանի մաս է կազմում: Սա Հայաստանի տարածքային հայցն է Ադրբեջանի դեմ», - ասել է Ամիրբեկովը: 

Նրա խոսքով՝ Հայաստանը պետք է վերացնի դա։