Երեք իսրայելցիներ տուժել են ապրիլի 22-ի առավոտյան Երուսաղեմի Յերմիյագու և Թհելեթ Մորդեխայ փողոցների խաչմերուկում գտնվող սինագոգի մոտ երկու ահաբեկիչների կողմից կատարված դիտավորյալ վրաերթի հետևանքով: Կասկածյալներից երկուսը փախուստի են դիմել, նրանց որոնումներով զբաղվում է ոստիկանությունը։ Նրանք զինված էին «Կառլո» ինքնաձիգներով (Carl Gustaf-ի արհեստավորական տարբերակը) և կացնով։

Ոստիկանությունն արդեն պարզել է, որ կասկածյալները մայրաքաղաք Ռոմեմի շրջան են ժամանել սպիտակ Կիա ավտոմեքենայով: Մեծ արագությամբ նրանք մեքենան ուղղել են սինագոգի մոտ գտնվող մարդկանց վրա, վրաերթի ենթարկել, որից հետո բախվել հանդիպակաց մեքենային։

Արտաքին հսկողության տեսախցիկի տեսագրությունում երևում է, որ բախումից հետո ահաբեկիչներից մեկը դուրս է գալիս մեքենայից, հանում է ինքնաձիգը, բայց չի կարողանում կրակոց արձակել խցանված զենքի պատճառով: Երկրորդը օգնության է հասնում նրան, բայց կրակոց այդպես էլ չի եղել։

Ահաբեկիչների որոնման համար մոբիլիզացվել են ոստիկանության խոշոր ուժեր։ Օդ են բարձրացել ուղղաթիռն ու դրոնները։ Ճանապարհներին ցուցադրվում են շարժական անցակետեր։

Շտապօգնության ծառայությունից հայտնել են, որ դեպքի մասին տեղեկություն են ստացել ժամը 07:52-ին: Սկզբում տպավորություն էր ստեղծվում, որ խոսքը երկու դեպքի մասին է, բայց հետո պարզ դարձավ, որ դեպքի վայրը մեկն է եղել։

Բժիշկ Դանիել Լևին պատմել է, որ տուժածներից մեկը՝ 22 տարեկան տղամարդը, լիովին գիտակից է եղել, նա կապտուկներ է ստացել։ Եվս երկու ծայրահեղ ուղղափառ տղամարդ՝ 15 և 18 տարեկան, թեթև վնասվածքներ են ստացել։ Տուժածները տեղափոխվել են Շաարե Զեդեկի հիվանդանոց։