ՌԴ ԱԳՆ-ն՝ Մերձավոր Արևելքում տեղի ունեցողի մասին

Ռուսաստանը խիստ մտահոգված է Մերձավոր Արևելքում հերթական վտանգավոր էսկալացիայի կապակցությամբ և բոլոր ներգրավված կողմերին զսպվածության կոչ է անում: Այս մասին ասվում է ՌԴ ԱԳՆ հայտարարության մեջ՝ կապված Իսրայելի տարածքի վրա հարձակման հետ։

«Ծայրահեղ մտահոգություն ենք հայտնում տարածաշրջանում հերթական վտանգավոր էսկալացիայի կապակցությամբ։ Բազմիցս զգուշացրել ենք, որ Մերձավոր Արեւելքում, առաջին հերթին, պաղեստինա-իսրայելական հակամարտության գոտում բազմաթիվ ճգնաժամերի չկարգավորումը, որոնք հաճախ բորբոքվում են անպատասխանատու սադրիչ գործողություններով, կհանգեցնեն լարվածության աճի», - հայտարարել են նախարարությունում:

«Բոլոր ներգրավված կողմերին զսպվածության կոչ ենք անում։ Ակնկալում ենք, որ տարածաշրջանային պետությունները առկա խնդիրները կլուծեն քաղաքական-դիվանագիտական միջոցներով ։ Կարևոր ենք համարում, որպեսզի կառուցողական տրամադրված միջազգային խաղացողները նպաստեն դրան», - նշել են ՌԴ ԱԳՆ-ում։

Միևնույն ժամանակ, Ռուսաստանի դիվանագիտական գերատեսչությունում ուշադրություն են հրավիրել այն փաստի վրա, որ ՄԱԿ-ի Անվտանգության խորհուրդը չի կարողացել համարժեք արձագանք տալ Սիրիայում Իրանի հյուպատոսությանը հասցված հարվածին՝ դրա արևմտյան անդամների դիրքորոշման պատճառով: