ԱՄՆ-ն, Ֆիլիպինները և Ճապոնիան միջուկային զենք ունեցող երկրներին կոչ են արել

Միացյալ Նահանգները, Ֆիլիպինները և Ճապոնիան պնդում են, որ պատրաստ են ձգտելու դեպի առանց միջուկային զենքի աշխարհ՝ Միջուկային զենքի չտարածման պայմանագրին համապատասխան: Այս մասին ասված է ԱՄՆ նախագահ Ջո Բայդենի, Ճապոնիայի վարչապետ Ֆումիո Կիսիդայի և Ֆիլիպինների նախագահ Ֆերդինանդ Մարկոս ​​Կրտսերի համատեղ հայտարարության մեջ: 

ՏԱՍՍ գործակալության փոխանցմամբ` հայտարարության մեջ ասվում է. «Մենք վերահաստատում ենք դեպի առանց միջուկային զենքի աշխարհ մեր համատեղ ձգտումը, որի անկյունաքարն է Միջուկային զենքի չտարածման պայմանագիրը, և միջուկային զենք ունեցող երկրներին կոչ ենք անում աջակցելու կայունությանն ու թափանցիկությանը, ինչպես նաև առարկայական երկխոսություն վարելու միջուկային ռիսկերի նվազեցման շուրջ:

Մենք նաև կոչ ենք անում անհապաղ սկսելու միջուկային զենքի համար տրոհվող նյութի արտադրության արգելման պայմանագրի շուրջ վաղուց հասունացած բանակցությունները»: 

Նշենք, որ հայտարարությունը տարածել է Սպիտակ տան մամուլի ծառայությունը՝ Վաշինգտոնում կայացած բանակցություններից հետո։

Բացի այդ, երկրները հայտարարել են Կորեական թերակղզու ամբողջական ապամիջուկայնացման հանձնառության մասին և վճռականորեն դատապարտել են ԿԺԴՀ-ի էսկալացիոն սպառնալիքները և բալիստիկ հրթիռների աննախադեպ քանակությունը, որոնք լուրջ վտանգ են ներկայացնում խաղաղության և անվտանգության համար: