Շենգենյան գոտու անալոգը կարող է հայտնվել Հարավարևելյան Ասիայում. Bloomberg

Շենգենյան գոտու անալոգը կարող է հայտնվել Հարավարևելյան Ասիայում: Այս գաղափարն առաջ է քաշում Թաիլանդի վարչապետ Սեթթա Թավիսինը։ Ըստ Bloomberg-ի՝ վերջին ամիսներին նա այդ մասին քննարկել է Կամբոջայից, Լաոսից, Մալայզիայից, Մյանմայից և Վիետնամից գործընկերների հետ։

Խոսքը Շենգենյան վիզայի տարածաշրջանային անալոգի ստեղծման մասին է։ Եթե ​​գաղափարը կյանքի կոչվի, ապա զբոսաշրջիկները կկարողանան ազատ ճանապարհորդել հարեւան վեց երկրների միջեւ։

Ինչպես նշում է Bloomberg-ը, Թաիլանդը ձգտում է ավելացնել զբոսաշրջության եկամուտը և պաշտպանել իր տնտեսությունը այնպիսի անբարենպաստ գործոններից, ինչպիսիք են «դանդաղ արտահանումը և թույլ համաշխարհային պահանջարկը»: Երկրների ղեկավարների մեծ մասը, որոնց հետ բանակցել է Սեթթա Թավիսինը, դրական են վերաբերվում միասնական վիզայի հայեցակարգին, ասվում է հրապարակման մեջ։

«Մեկ վիզան կարող է հեշտացնել որոշումը երկար ճանապարհորդող զբոսաշրջիկների համար», - ասում է Թաիլանդի հյուրանոցների ասոցիացիայի նախկին նախագահ Մարիսա Սուկոսոլը:

Նրա կարծիքով, նման վիզայի վավերականությունը պետք է երկարաձգվի սովորական 30-ից մինչև 90 օր՝ այն գրավիչ դարձնելու համար։