Թուրքիան Ադրբեջանին ամեն կերպ կաջակցի․ Չավուշօղլու

Զանգեզուրի միջանցքի բացումն, անշուշտ, օգուտ կբերի բոլորին։ Այս մասին լրագրողների հետ զրույցում հայտարարել է ՆԱՏՕ-ի ԽՎ-ում Թուրքիայի Ազգային մեծ ժողովի պատվիրակության ղեկավար Մևլութ Չավուշօղլուն:

«Այդ միջանցքի բացումը լավ օգուտ է խոստանում ինչպես տարածաշրջանի, այնպես էլ հենց Հայաստանի համար։ Այդ առումով մենք աջակցում ենք Զանգեզուրի միջանցքի բացմանը», - ասել է նա։

Նա հայտնել է նաև, որ Թուրքիան աջակցում է հայ-ադրբեջանական հարաբերությունների հարցում երկկողմ հանդիպման անցկացմանը։

«Մենք աջակցում ենք այս ուղղությամբ վերջին հանդիպումներին և հույս ունենք, որ դրանք կշարունակվեն», - ասել է նա:

Չավուշօղլուն վստահեցրել է, որ  Թուրքիան ամեն կերպ կաջակցի Ադրբեջանին։

«Ադրբեջանի Հանրապետության և Թուրքիայի Հանրապետության միջև դաշնակցային հարաբերությունների մասին «Շուշիի հռչակագրի համաձայն՝ Թուրքիան Ադրբեջանին ամեն կերպ կաջակցի»,- ասել է նա։

«Հայաստանին ռազմական աջակցություն ցուցաբերելն այսօր ոչ մի օգուտ չի խոստանում ոչ Հայաստանին, ոչ տարածաշրջանին ։ Փոխարենը պետք է խրախուսել խաղաղությունը տարածաշրջանում», - ընդգծել է նա։