ՌԴ–ում կալանավորվել է «Լուկօյլ»–ի կառուցվածքային ստորաբաժանման ղեկավարը

ՌԴ–ում Բասմանի դատարանը թույլ է տվել կալանավորել «Լուկօյլ» ՓԲԸ-ի կառուցվածքային ստորաբաժանումներից մեկի ղեկավար Ալեքսեյ Ստեփանովին, ով մեղադրվում է կոռուպցիոն հանցագործությունների մեջ։

«Դատարանը բավարարել է նախաքննական մարմինների հարցումը՝ «Լուկօյլ» ՓԲԸ-ի կառուցվածքային ստորաբաժանումներից մեկի ղեկավար Ալեքսեյ Ալեքսանդրովիչ Ստեփանովի նկատմամբ խափանման միջոց ընտրելու մասին՝ կալանքի տեսքով մինչև հունիսի 2-ը», - հայտնում է դատարանի մամուլի ծառայությունը։

Դատարանը պարզաբանել է, որ Ստեփանովը ղեկավարել է «Լուկօյլ» ՓԲԸ մաքսային մարմինների հետ աշխատանքի բաժինը։

Դատարանը տնային կալանքի է ենթարկել նաև Ռուսաստանի Դաշնային մաքսային ծառայության Կենտրոնական էներգետիկ մաքսատան էներգետիկ մաքսային բաժնի պետի տեղակալ Ալեքսեյ Ակիմովին և այլ անձանց:

Մեղադրանքի մանրամասները դատարանում չեն բացահայտվել։ Միաժամանակ, ինչպես «Ինտերֆաքս»-ին պարզաբանել է իրազեկ աղբյուրը, գործով մեղադրյալները բերման են ենթարկվել ապրիլի 3-ին։ Նրանք մեղադրվում են անցյալ տարվա սկզբից կոռուպցիոն հանցագործություններ կատարելու մեջ՝ կապված նավթավերամշակող կազմակերպությունների արտաքին առևտրային գործունեության մասին ապօրինի տվյալների ստացման հետ, որոնք օրենքով պաշտպանված հարկային գաղտնիք են։