Ղազախստանի խոշորագույն բանկերից մեկը՝ Halyk Bank-ը, փետրվարի 27-ից վերջապես դադարեցրել է Мир քարտերի սպասարկումը։ Սպասարկումը դադարեցվել է ինչպես բանկոմատների, այնպես էլ POS տերմինալների միջոցով։

«Վերջին փոփոխությունը եղել է փետրվարի 27-ին, Мир քարտերն այլևս չեն սպասարկվում», - ТАСС-ին հայտնել են Halyk Bank-ի հեռախոսային կենտրոնում։

Halyk Bank–ը սահմանափակել է ռուսական Мир քարտերի սպասարկումը 2022 թվականի գարնանը։ Այն թույլ էր տալիս վճարումներ կատարել POS տերմինալների միջոցով, բայց առանց կանխիկացման հնարավորության։ 2022 թվականի դեկտեմբերին վճարումները կասեցվել են։

Ներկայումս Ղազախստանում Мир քարտերի սպասարկումն իրականացվում է ռուսական ВТБ–ի դուստր ձեռնարկության միջոցով: Քարտը հնարավոր է բացել միայն ազգային արժույթով` տենգեով:

Այսօր հայտնի դարձավ, որ առաջիկա օրերին Ղրղզստանում կդադարեցվի Мир քարտերի սպասարկումը։ Մարտի 30-ին Հայաստանի ArCa վճարային համակարգի մասնակից բանկերի կողմից դադարեցվել է Мир քարտերի սպասարկումը։