ՏԵՍԱՆՅՈՒԹ․ Վիճաբանություն, ծեծկռտուք՝ Վրաստանի խորհրդարանում

Իշխող «Վրացական երազանք» կուսակցությունը Վրաստանի խորհրդարանում ծեծկռտուք է հրահրել՝ օտարերկրյա գործակալների մասին օրինագծի պատճառով։

Վրաստանի խորհրդարանի անդամներից Ալեկո Էլիսաշվիլին ցավագին է արձագանքել «Վրացական երազանք» կուսակցության կողմից օտարերկրյա գործակալների մասին օրինագծի կրկնակի ներկայացմանը: Նախաձեռնության հեղինակներն առաջարկում են սահմանել «օտարերկրյա պետության շահերից ելնելով գործունեություն իրականացնող կազմակերպություն» կարգավիճակը։

Պատգամավորն օրինագիծն անվանել է «ռուսական» և «վիրավորական բոլորի համար», իսկ «Վրացական երազանքի» անդամներն իրենց հերթին վիրավորել են նրա խոսքերի պատճառով. արդյունքում խորհրդարանում վիճաբանություն է տեղի ունեցել: Էլիսաշվիլիին դուրս են բերել դահլիճից, քանի դեռ վիճաբանությունը ծեծկռտուքի չէր վերածվել։

Իշխող «Վրացական երազանք» կուսակցությունը մտադիր է կրկին խորհրդարան մտցնել օտարերկրյա գործակալների մասին օրինագիծը: Տեղեկությունը հայտնել է կուսակցության գործադիր քարտուղար Մամուկա Մդինարաձեն:

«Խորհրդարանական մեծամասնությունը, խորհրդակցելով կուսակցության քաղխորհրդի հետ, որոշել է կրկին խորհրդարան մտցնել օտարերկրյա ազդեցության թափանցիկության մասին օրինագիծը», - հայտարարել է Մդինարաձեն ճեպազրույցի ժամանակ:

Նրա խոսքով՝ «Օտարերկրյա ազդեցության գործակալ» տերմինի փոխարեն կօգտագործվի «Օտարերկրյա ուժի շահերի հաղորդիչ կազմակերպություն» տերմինը։

Մդինարաձեն նշել է, որ հասարակությունը պետք է իմանա, թե ինչ է գրված այդ օրենքում, իր միակ պահանջն այն է, որ տարին մեկ անգամ հայտարարագիր լրացնի, հրապարակի արտասահմանյան ֆինանսավորում ստացող կազմակերպության ֆինանսական հաշվետվությունը, որի խախտման համար որոշակի տուգանքներ են նախատեսված:

Հիշեցնենք, որ անցյալ տարվա մարտին ԱՄՆ-ում գործող FARA օտարերկրյա գործակալների մասին օրենքի լիբերալ տարբերակը, որը ցանկանում էին ընդունել նաև Վրաստանում, ընդդիմությունն ու արևմտյան քաղաքական գործիչներն անընդունելի էին անվանել: Վրաստանում ԱՄՆ դեսպանատունը կտրուկ արձագանքել էր օրենքին՝ մարտի 7-ը անվանելով «սև օր վրացական ժողովրդավարության համար» և հայտարարելով, որ «Կրեմլից ոգեշնչված» օրինագծերի քննարկումը շարունակելը հակասում է Եվրոպային ինտեգրվելու Վրաստանի ցանկությանը:

Դա հանգեցրել էր զանգվածային բողոքի ցույցերի, բախումներ էին տեղի ունեցել ոստիկանության հետ։ Այն ժամանակ ուժայինները ցրել էին հանրահավաքը արցունքաբեր գազի և ջրցան մեքենաների կիրառմամբ։ Հաղորդվում էր մի քանի տուժածների մասին ինչպես ոստիկանների, այնպես էլ ցուցարարների, ինչպես նաև ձերբակալված մասնակիցների շրջանում: Հետագայում Վրաստանի խորհրդարանը դեմ քվեարկեց օտարերկրյա գործակալների մասին սկանդալային օրինագծին։

Խորհրդարանի խոսնակ Շալվա Պապուաշվիլին այն ժամանակ հայտարարեց, որ օտարերկրյա գործակալների մասին օրինագծի շուրջ ստեղծված իրավիճակը ապատեղեկատվության և քարոզչության շատ բարդ ալիք էր. նախագիծը նույնիսկ թղթի վրա չէր ձևակերպվել, երբ այն ռուսական օրենք անվանեցին: