Ինչով է պայմանավորված Ադրբեջանի վերջին սադրանքը՝ ըստ ՔՊ պատգամավորի

Ադրբեջանի վերջին սադրանքը պայմանավորված է ապրիլի 5–ին Բրյուսելում նախատեսված ՀՀ վարչապետ Նիկոլ Փաշինյանի, Եվրոպական հանձնաժողովի նախագահ Ուրսուլա Ֆոն դեր Լյայենի և ԱՄՆ պետքարտուղար Էնթոնի Բլինկենի հանդիպմամբ։ Այս մասին ՀՀ Ազգային ժողովում ճեպազրույցի ժամանակ ասաց ՀՀ ԱԺ պաշտպանության և անվտանգության հարցերի մշտական հանձնաժողովի նախագահի տեղակալ, ԱԺ ՔՊ խմբակցության պատգամավոր Արմեն Խաչատրյանը։

«Ադրբեջանի նման պահվածքը մեզ համար նոր չէ։ Ադրբեջանը կեղծ լուրեր է տարածում, թե իբր ապրիլի 1-ին ՀՀ ԶՈւ ստորաբաժանումները կրակ են բացել սահմանագոտու հարավարևմտյան հատվածում տեղակայված ադրբեջանական դիրքերի ուղղությամբ, նպատակ ունեն լեգիտիմ հիմքեր ստեղծելու` հարձակման համար։ Մեզ համար նորություն չէ Ադրբեջանի այս պրիմիտիվ ձեռագիրը. եթե դա մեկ–երկու տարի առաջ հաջողվում էր նրան, ապա հիմա` ոչ, քանի որ ԵՄ դիտորդները ժամեր անց օբյեկտիվ իրականությունը ներկայացնում են աշխարհին` ցույց տալով, որ Ադրբեջանը հերթական անգամ ստում է»,– ասաց պատգամավորը։

Նրա խոսքով` Ադրբեջանն այսօր չի ձգտում խաղաղության, այլ ամեն ինչ անում է, որ վիժեցնի խաղաղությունը, բայց Հայաստանը միանշնակ գնալու է այդ ուղղությամբ ու Ադրբեջանին պարտադրելու է խաղաղություն։

Ըստ պատգամավորի` Ալիևը ագրեսիվ հայտարարություններ անում է իր ներքին լսարանի համար, ու դա բռնապետին բնորոշ դրսևորում է։

«Այդպիսով նա փորձում է իրեն դնել շատ ուժեղ ղեկավարի, տղու տեղ, բայց փորձն ու պատմությունը ցույց են տալիս, որ դա երկար չի տևում։ Ես հաստատ գիտեմ, որ կգա այն օրը, երբ ՀՀ-ի դեմ բառեր ու գործողություններ անելուց առաջ շատ երկար կմտածեն ու երևի թե չեն անի»,– ընդգծեց նա։

Այսօր, ըստ նրա, ՀՀ իշխանությունների քայլերը հավասարակշռված են հատկապես սահմանազատման գործընթացում. դա գալիս է նրանից, որ ռազմական բալանսը երկու երկների միջև այնքան խախտված է, որ ՀՀ–ն այսօր պատերազմի գնալու ցանկություն չունի։