Հայաստանը շարունակում է մնալ ՀԱՊԿ լիիրավ անդամ․ Զախարովա
Հայաստանը շարունակում է մնալ ՀԱՊԿ լիիրավ անդամ։ Այս մասին այսօր ամենշաբաթյա ճեպազրույցի ժամանակ ասել է Ռուսաստանի ԱԳՆ մամուլի ծառայության ղեկավար Մարիա Զախարովան:
«Ես ՀԱՊԿ անդամ երկրների շարքում գիտեմ միայն մեկ անդամի, որը խոսում է այն մասին, որ մեկ ՀԱՊԿ-ը դուրս է գալիս, մեկ ՀԱՊԿ-ից դուրս է գալիս, մեկ մասնակից է, մեկ սառեցնում է։ Մենք դա լսում ենք միայն Երևանի իշխանություններից։ Բանն այն է, որ Հայաստանը շարունակում է մնալ ՀԱՊԿ լիիրավ անդամ։ Ի թիվս այլ բաների, ՀԱՊԿ կանոնադրությունը, ինչպես նաև առաջնորդների կողմից 2011 թվականին ստորագրված համապատասխան արձանագրությունը նախատեսում են, որ ՀԱՊԿ անդամ պետությունը կարող է որոշում ընդունել իր տարածքում երրորդ երկրների զորքերի և արտաքին ենթակառուցվածքի օբյեկտների տեղակայման մասին միայն միավորման մյուս անդամ պետությունների հետ անհետաձգելի խորհրդակցություններ անցկացնելուց հետո»,-ասել է նա։
Ինչ վերաբերում է կազմակերպության շրջանակներում պարտավորությունների խախտման դեպքում պետության համար հնարավոր հետևանքներին, Զախարովան նշել է, որ դրանք ևս հստակ արձանագրվել են:
«Խոսքը կարող է գնալ Հավաքական անվտանգության խորհրդի որոշմամբ ՀԱՊԿ մարմինների գործունեությանը նման պետության մասնակցության դադարեցման մասին, կարող է լինել նաեւ միավորումից բացառումը», - հավելել է նա:
