Ֆրանսիայի նման երկրների քաղաքականությունը վերջին 30 տարիներին կոծկել է Հայաստանի ագրեսիան․ Ադրբեջանի ԱԳՆ

Ֆրանսիայի ԱԳ նախարար Ստեֆան Սեժուրնեի հայտարարությունը Հարավային Կովկասում իրավիճակի վերաբերյալ հերթական անգամ վառ օրինակ է տարածաշրջանում նոր լարվածություն ստեղծելու և Բաքվի ու Երևանի միջև խաղաղ գործընթացը խոչընդոտելու Փարիզի ջանքերի։ Այս մասին հայտարարել է Ադրբեջանի ԱԳՆ մամուլի քարտուղար Այհան Հաջիզադեն: Փոխանցում են տեղական լրատվամիջոցները։

«Ֆրանսիայի Եվրոպայի և արտաքին գործերի նախարար Ստեֆան Սեժուրնեի կողմից 2024 թվականի ապրիլի 2-ին Փարիզում ԱՄՆ պետքարտուղարի հետ համատեղ մամուլի ասուլիսի ժամանակ Ադրբեջանի դեմ առաջադրված անհիմն մեղադրանքները հերթական անգամ տարածաշրջանում ակնհայտ լարվածություն ստեղծելու և խաղաղ գործընթացը խոչընդոտելու Ֆրանսիայի ջանքերի վառ օրինակն են», - ասել է Հաջիզադեն։

Նրա խոսքով ՝ «անթույլատրելի է, որ ֆրանսիական կողմը, որն իրականացնում է Հայաստանի ակտիվ սպառազինությունը, խրախուսում է ռազմատենչությունը տարածաշրջանում, մեղադրի Ադրբեջանին ագրեսիվ հռետորաբանության մեջ»:

«Բոլորի համար պետք է պարզ լինի, որ Ֆրանսիայի նման երկրների քաղաքականությունը, որը վերջին 30 տարիների ընթացքում կոծկել է Հայաստանի ագրեսիան, ոչ մի օգուտ չի տվել։ Ընդ որում, Փարիզը պետք է հասկանա, որ իր կողմից իրականացվող ապակառուցողական գործունեությունը պետք է դադարեցվի», - ընդգծել է Հաջիզադեն։

Ավելի վաղ Սեժուրնեն հայտարարել է, որ ՀՀ-ի տարածքային ամբողջականությունը գտնվում է Ադրբեջանի կողմից սպառնալիքի տակ։