Նման պահերին ոչ մեկի, հատկապես պետության ղեկավարի քունը չի տանում․ Պեսկով

«Կրոկուսում» տեղի ունեցած ահաբեկչությունից հետո ՌԴ նախագահ Վլադիմիր Պուտինը մշտապես կապի մեջ է եղել ուժային կառույցների ղեկավարների հետ, որոնք նրան զեկուցել են այն մասին, թե ինչպես է պատրաստվում եւ տեղի ունենում ձերբակալությունը: Այս մասին հայտնել է պետության ղեկավարի մամուլի քարտուղար Դմիտրի Պեսկովը լրագրող Պավել Զարուբինի Telegram-ալիքում տեղադրված տեսանյութում:

«Առավոտյան արդեն աշխատանքը շարունակվել է։ Եվ խորհրդակցություններ, և նախագահը մշտապես, ինչպես ասում են, նստած էր հեռակառավարման վահանակի մոտ, այսինքն՝ ուղիղ կապով նրա մոտ էին գալիս ղեկավարները, առաջին հերթին այդ պահին ուժային կառույցների ղեկավարները և զեկուցում էին նրան այն մասին, թե ինչպես է պատրաստվել, ինչպես է տեղի ունեցել ձերբակալությունը», - ասել է նա լրագրողին։

Հարցին, թե, արդյո՞ք, նախագահն ամբողջ գիշերն անքուն է անցկացրել, Պեսկովը պատասխանել է. «Իհարկե»:

«Նման պահերին ոչ մեկի, հատկապես պետության ղեկավարի քունը չի տանում», - հավելել է նա։