Իրավիճակի սրման և սադրանքի ողջ պատասխանատվությունն ընկնելու է ՀՀ-ի և նրա հովանավորների վրա. Ադրբեջանի ՊՆ
Վերջին շրջանում հայ-ադրբեջանական պայմանական սահմանի տարբեր ուղղություններում նկատվում է կենդանի ուժի, զրահատեխնիկայի, հրետանային կայանքների, ինչպես նաև կրակային այլ ծանր միջոցների կենտրոնացում և ՀՀ զինված ուժերի զորքերի ինտենսիվ տեղաշարժ: Այս մասին հայտնում է Ադրբեջանի ՊՆ-ն։ Տեղեկությունը փոխանցում են տեղի լրատվամիջոցները:
«Վերջին օրերին Հայաստանում դրսևորվում է Ադրբեջանին պատերազմով սպառնացող ռևանշիստական ուժերի ակտիվացում, բարձր մակարդակի է հասել մեր երկրի դեմ ագրեսիվ հռետորաբանությունը, աճել է սադրիչ տեղեկատվության քանակը, որը ծառայում է տեղեկատվական տարածքում իրավիճակի սրմանը՝ սադրանքի փորձերին նախապատրաստվելու նպատակով»,- նշվում է հայտարարության մեջ:
«Զգուշացնում ենք, որ Հայաստանի զինված ուժերի կողմից Ադրբեջանի դեմ ռազմական սադրանքի ցանկացած փորձ վճռականորեն կկասեցվի ադրբեջանական բանակի կողմից: Մեկ անգամ ևս հայտարարում ենք, որ իրավիճակի սրման և ցանկացած հնարավոր սադրանքի ողջ պատասխանատվությունն ամբողջությամբ ընկնելու է Հայաստանի և նրա հովանավորների վրա»,- ասվում է երկրի ՊՆ հաղորդագրության մեջ։
