Բելառուսում արգելվել է Արարատի կոնյակի գործարանի արտադրանքի վաճառքը. հայտնի է պատճառը
Բելառուսի առողջապահության նախարարությունն արգելել է «Արարատի կոնյակի գործարանի» արտադրանքի ներմուծումը, իրացումը, պահպանումն ու տարանցումը։ Այս մասին նշվում է «Գոմելի հիգիենայի, համաճարակաբանության և հանրային առողջության տարածաշրջանային կենտրոն» պետական հաստատության պաշտոնական կայքէջում։
Նշվում է, որ «Այրում» նռան գինու բաղադրության մեջ հայտնաբերվել է սինթետիկ ներկանյութ՝ ազորուբին։ Արտադրանքի ներմուծման և իրացման արգելքի պատճառը դարձել է սխալ մակնշումը, սննդային արտադրանքի տվյալների կեղծումը։
Բելառուսի առողջապահության նախարարության որոշմամբ՝ գինու ամբողջ խմբաքանակը պետք է հանվի առևտրից և ոչնչացվի կամ հետ ուղարկվի։
Շփոթմունքից խուսափելու նպատակով նշենք, որ «Արարատի կոնյակի գործարան» ՍՊԸ-ն («ԱԿԶ» ԱՐԱՐԱՏԻ ԿՈՆՅԱԿԻ ԳՈՐԾԱՐԱՆ սահմանափակ պատասխանատվությամբ ընկերություն (ՍՊԸ)) նույնական չէ «Երևանի կոնյակի գործարանի» հետ։
