Դրանք դիտարկում ենք նաև որպես հաշվեհարդար․ Զախարովա
Քիշնևի ոչ բարեկամական գործողությունները, այդ թվում՝ Ռուսաստանի դիվանագետի արտաքսումը, Մոսկվայից անպատասխան չեն մնա։ Այս մասին ասվում է ՌԴ ԱԳՆ պաշտոնական ներկայացուցիչ Մարիա Զախարովայի մեկնաբանության մեջ։ Տեղեկությունը փոխանցում է ՏԱՍՍ-ը։
«Քիշնևում բացահայտորեն չարաշահում են ՄԱԿ-ի գծով միջոցառումները հյուրընկալող կողմի իրենց կարգավիճակը, ինչը հարցականի տակ է դնում Մոլդովական իշխանությունների՝ հետագայում այդ կարգավիճակում հանդես գալու կարողությունը։ Քիշնևի գործողությունները ռուսական կողմից անպատասխան չեն մնա»,- նշել են նախարարությունում։
Զախարովայի խոսքով՝ Մոլդովայի վերջին հակառուսական քայլերը, ներառյալ Քիշնևում ՌԴ դեսպանատան աշխատակցի «persona non grata» հայտարարությունը, դարձել են Մերձդնեստրի տարածքում ՌԴ նախագահի ընտրությունների անցկացման համար հաշվեհարդար:
«Այդ որոշումները Մոլդովական ղեկավարության կողմից իրականացվող հակառուսական արշավի մի մասն են և պատմական խոր արմատներ ունեցող ռուս-մոլդովական հարաբերությունների լիակատար ոչնչացման նրա կուրսի հերթական հաստատումը։ Դրանք դիտարկում ենք նաև որպես հաշվեհարդար այն բանի համար, որ Մերձդնեստրում բնակվող Ռուսաստանի քաղաքացիներին հնարավորություն է տրվել կամարտահայտություն իրականացնել ՌԴ նախագահի ընտրություններում», - ասել է դիվանագետը։
