Թուրքիայում ընտրություններից առաջ 33 մարդ է ձերբակալվել

Թուրքիայի արևմտյան Սաքարիա նահանգում ուժայինները ձերբակալել են ավելի քան 30 կասկածյալի՝ մարտի 31-ին կայանալիք ՏԻՄ ընտրություններից առաջ ահաբեկչություններ նախապատրաստելու կասկածանքով։ Այս մասին այսօր հայտնել է Թուրքիայի ներքին գործերի նախարար Ալի Երլիկայան: Տեղեկությունը փոխանցում է ՌԻԱ Նովոստին։

«Սաքարիա նահանգում «Իսլամական պետություն» ահաբեկչական խմբավորման դեմ գործողության ընթացքում ձերբակալվել է 33 կասկածյալ (Իսլամական պետության հետ կապված - խմբ.) հաստատվել է, որ ձերբակալվածների մեջ կան այնպիսիք, ովքեր ընտրությունների նախօրեին ահաբեկչություններ էին նախապատրաստում, զինյալներ ուղարկում հակամարտության գոտիներ, ֆինանսական օգնություն էին ցուցաբերում ահաբեկիչներին և անօրինական մզկիթներ ու մեդրեսեներ էին ղեկավարում»,- գրել է նախարարը X սոցիալական ցանցում։

Խուզարկությունների ընթացքում առգրավվել է զենք, զինամթերք, արգելված գրականություն եւ մեծ քանակությամբ արտարժույթ, նշել է Երլիկայան: