Մեծ Բրիտանիան կպաշտպանի Հայաստանին «ՌԴ-ի պատասխան միջոցների սպառնալիքներից»

Մեծ Բրիտանիայի պաշտպանության փոխնախարար Ջեյմս Հիպին հայտարարել է, որ Մեծ Բրիտանիան ընդունում է ՀԱՊԿ-ին անդամակցության սառեցման մասին Հայաստանի որոշումը եւ նախատեսում է աջակցություն ցուցաբերել Երեւանին «Ռուսաստանից բխող պատասխան միջոցների սպառնալիքների դեպքում»: Նա այդ մասին հայտնել է՝ պատասխանելով Բրիտանական խորհրդարանից գրավոր հարցմանը: Տեղեկությունը փոխանցում է RT-ն։

«Մեծ Բրիտանիան ճանաչում է այդ որոշումը (ՀԱՊԿ-ին անդամակցությունը սառեցնելու մասին) որպես Հայաստանի սուվերեն իրավունքի իրացում եւ կհամագործակցի եվրաատլանտյան դաշնակիցների հետ՝ Ռուսաստանից բխող պատասխան գործողությունների սպառնալիքներին աջակցություն ցուցաբերելու համար»,-հայտարարել է Հիպին։

Միացյալ Թագավորության պաշտպանության փոխնախարարը այդ մասին հայտնել է պատգամավոր Ռոբերտ Բաքլենդի հարցմանը գրավոր պատասխանում: Խորհրդարանականը հարցրել է Հավաքական անվտանգության պայմանագրի կազմակերպությունից Հայաստանի դուրս գալու դեպքում Մեծ Բրիտանիայի պաշտպանական արդյունաբերության համար հնարավոր շահի մասին:

Հիպին նշել է, որ ցանկացած օգուտ պետք է տեղավորվի ԵԱՀԿ-ի կողմից զենքի էմբարգոյի շուրջ համաձայնեցված սահմանափակումների շրջանակներում, որը ստորագրել է Մեծ Բրիտանիան: Ընդ որում, նա ընդգծել է, որ Լոնդոնը կշարունակի սերտորեն համագործակցել Հայաստանի հետ «համագործակցության խորացման հնարավորությունների որոնման հարցում»:

RT-ի հետ զրույցում էլ Ռուսաստանի գիտությունների ակադեմիայի Եվրոպական հետազոտությունների կենտրոնի աշխատակից Վլադիմիր Օլենչենկոն ասել է, որ արևմտյան երկրները ծրագրում են Հայաստանը «քաշել» եվրոպական կառույցների մեջ։

«Այս պլանը եղել է Փաշինյանի իշխանության հասնելու ժամանակ, և, ըստ երևույթին, դրա համար էլ նրա քայլերն ուղղված են Հայաստանին մեկուսացնելուն։ Չնայած դա հակասում է պատմական ավանդույթին, բնակչության շահերին և ողջախոհությանը: Միացյալ Նահանգները շահագրգռված է, որ Հայաստանը խթանիչ լինի Ռուսաստանի նկատմամբ։ Այս առումով նրանք հանձնարարում են ինչ-որ մեկին բարձրաձայնել իրենց ռազմավարությունները՝ այս դեպքում՝ Մեծ Բրիտանիային: Հաշվի առնելով այն, որ Երևանը դիտարկում է ԵՄ-ին անդամակցելու հնարավորությունը, այս ամենը կարծես մեկ պլանի տարրեր լինեն»,- ասում է քաղաքագետը։

Ավելի վաղ ՌԴ ԱԳՆ պաշտոնական ներկայացուցիչ Մարիա Զախարովան հայտարարել էր, որ Մոսկվան Հայաստանին կոնսուլտացիաներ է առաջարկել ՀԱՊԿ-ի վերաբերյալ մտահոգությունները վերացնելու համար: