Մոսկվայում ուսանողը 10 օրով ձերբակալվել է Wi-Fi ցանցի ուկրաինամետ անվան համար
Մոսկվայի Նիկուլինյան դատարանը տասն օրով ձերբակալել է ՄՊՀ ուսանող Օլեգ Տարասովին, ով հանրակացարանում իր Wi-Fi ցանցն անվանել է «Սլավա Ուկրաինա»: Այս մասին հայտնի է դառնում դատարանի տվյալների բազայի տեղեկատվությունից: Երիտասարդը մեղավոր է ճանաչվել նացիստական խորհրդանիշներ ցուցադրելու մեջ։ Այս մասին գրում է RTVI–ը:
Նշվում է, որ ուսանողը, ով նախկինում վարչական պատասխանատվության չի ենթարկվել, փոխել է Wi-Fi ցանցի անունը «Սլավա Ուկրաինա» կարգախոսով, և իբր դա արել է «ուկրաինացի ազգայնականների կարգախոսը քարոզելու նպատակով»։
Դատարանում 22-ամյա ուսանողը խոստովանել է, որ ցանցն ինքնուրույն է ստեղծել։ 2022 թվականին նա գնացել է հակապատերազմական ցույցերի, գրում են թելեգրամյան ալիքները: Կրկնակի խախտման դեպքում Տարասովի նկատմամբ կարող է քրեական գործ հարուցվել:
