Քաղապետարանից՝ Գայի պողոտայի զբոսայգիներից մեկի քանդման մասին
Երևանի քաղաքապետի համապատասխան որոշումներով անօրինական տիրապետումից ազատվելու են համայնքային սեփականություն հանդիսացող հողամասերը և դրանցում առկա անօրինական շինությունները: Այս մասին գրառում է կատարել Երևանի քաղաքապետի մամուլի քարտուղար Հայկ Կոստանյանը։
«Նոր Նորք վարչական շրջանի Լվովյան փողոցի մի քանի հասցեներում հասարակական նշանակության կանաչ տարածքներում, համայնքային սեփականություն հանդիսացող հողամասի վրա կառուցվել են անօրինական շինություններ, որոնցով ծանրաբեռնվել է համայնքային սեփականություն հանդիսացող հողամասերը»,- գրել է նա:
Auroranews-ը զանգեր էր ստանում այն մասին, որ Թաթոլ Կրպեյանի անվան զբոսայգում և հարակից տարածքում կատարվում են քանդման աշխատանքներ՝ բարձրահարկ շինություն կառուցելու համար։ Տեղում են հավաքված են բազմաթիվ կարմիրբերետավորներ և ոստիկաններ։ Բնակիչները թույլ չեն տալիս ոստիկաններին մոտենալ իրենց տներին։
Ոստիկանությունից Auroranews-ին հայտնեցին, որ նրանք պահպանում են հասարակական կարգը։
Auroranews-ի հետ զրույցում էլ Կոստանյանը նշեց՝ Մյասնիկյան պողոտայի ամբողջ հատվածում, նաև զբոսայգու հատվածում իրականացվող աշխատանքներն ապօրինի շինություններից ազատման համար են: Դրանք քանդվելու են, և տեղում ծառեր են տնկվելու:
Հրատապով իրականացվելու դեպքում էլ ծանուցման կարիք չկա օրենքի տեսանկյունից: Մարդիկ պարբերաբար տեղեկացվել են, ծանուցվել:
