Հարավային Կորեան և ԱՄՆ-ն մարտի 4-ին կսկսեն Freedom Shield զորավարժությունները

Կորեայի Հանրապետության զինված ուժերն ու ԱՄՆ զինվորականները մարտի 4-ից 14-ը կանցկացնեն Freedom Shield զորավարժությունները: Այս մասին հայտնում է Կորեայի Հանրապետությունում ամերիկյան ռազմական կոնտինգենտը։

Զորավարժությունը կներառի գործողություններ ցամաքում, ծովում, օդում և կիբերտարածությունում, ինչպես նաև «տիեզերական միջոցների» օգտագործում՝ թշնամու միջուկային ուժերին արձագանքելու համար։ Զորավարժություններին մասնակցում են նաև ՄԱԿ-ի հրամանատարության անդամ 10 երկրների ներկայացուցիչներ։ Freedom Shield-ը ներառում է «դաշտային և վիրտուալ վարժություններ» համակարգչային սիմուլյացիաների միջոցով:

Freedom Shield–ի հետ կապված Հարավային Կորեան և ԱՄՆ-ն մի քանի լայնածավալ վարժանքներ կանցկացնեն՝ ուղղված համագործակցության և մարտական ​​պատրաստության ամրապնդմանը, ասվում է մամուլի հաղորդագրությունում։ Փհենյանում ԱՄՆ-Հարավային Կորեա զորավարժությունները սովորաբար անվանում են ԿԺԴՀ-ի դեմ պատերազմի փորձ:

Հարավային Կորեայի պաշտպանության նախարար Շին Վոն Սիկը երեքշաբթի ասել է, որ Սեուլն ու Վաշինգտոնն այս տարվա առաջին կիսամյակում երկու անգամ ավելի շատ զորավարժություններ կանցկացնեն, քան անցյալ տարի։