Արցախցիներին ապրելու համար առաջարկվող տարածքները և աշխատատեղերը համադրելի չեն. փոխվարչապետ
Արցախից բռնի տեղահանված մեր հայրենակիցներին ապրելու համար առաջարկվող տարածքներն ու այնտեղ աշխատելու հնարավորությունները համադրելի չեն։ Ազգային ժողովում կառավարության հետ հարցուպատասխանի ժամանակ այս մասին ասաց ՀՀ փոխվարչապետ Տիգրան Խաչատրյանը։
«Ընդունում ենք, որ Հայաստանի բոլոր մարզերում չէ, որ աշխատանքի հնարավորությունները մեծ են։ Կամ կարող ենք միանգամից համաձայնել, որ աշխատելու հնարավորություններն ավելի մեծ են Երևանում և սահմանակից մարզերում։ Բայց նաև աջակցության հիմքում դրված է այն մոտեցումը, որ ընտանիքն է ընտրում, թե որտեղ իրացնել իր գնման իրավունքը»,- ասաց փոխվարչապետը։
Նրա կարծիքով՝ իրավիճակը բնական կարգավորման արդյունքի կգա։ Կառավարությունը նաև որոշակի մարզերում լրացուցիչ աջակցության միջոցներ կգործադրի։
Հայաստանի կառավարությունը քննարկում են Արցախից բռնի տեղահանվածներին լրացուցիչ ֆինանսական աջակցություն տրամադրելու հնարավորությունը, եթե նրանք համաձայնեն ապրել հեռավոր շրջաններում։ Հաջորդ շաբաթ կառավարությունն աշխատանքային քննարկման համար կհրապարակի նախընտրելի բնակավայրերի ցանկը, որտեղ նախատեսվում է նման օգնություն տրամադրել։
Նախատեսված գումարը լինելու է միանվագ աջակցություն՝ 3 մլն դրամի չափով մեկ անձի համար։
«Բացի այդ, մենք հնարավորություն ենք տալու, որ եթե տան գնման վկայագրի գումարն ամբողջությամբ չօգտագործվի (բնակարանի համար տրամադրվածից պակաս գումար պետք լինի), ապա մնացած գումարը հնարավորություն ենք տալու օգտագործել տնտեսական ակտիվ ձեռք բերելու համար, օրինակ՝ գյուղատնտեսական նշանակության հողամաս»,- հավելեց նա:
Նա կրկնեց, որ հավաստագրերը նախատեսվում է տրամադրել փուլ առ փուլ։
Հիշեցնենք` ՀՀ փոխվարչապետը փետրվարի 27–ին Հանրային հեռուստաընկերության եթերում ասել էր, որ այն արցախցիները, որոնք կդառնան ՀՀ քաղաքացի ու կենսականորեն իրենց ապագան կկապեն Հայաստանի հետ, հնարավորություն կստանան այստեղ սեփականության իրավունքով տուն ունենալու։
Նրա խոսքով` 10 տարի անց միայն ընտանիքը հնարավորություն կստանա տնօրինելու այդ գույքը, այդ թվում` վաճառելու։
Փոխվարչապետն ընդգծել էր, որ այն տարածքները, որոնք կտրամադրվեն արցախցիների տների կառուցման համար, չեն լինի բացառապես սահմանամերձ բնակավայրեր, սակայն կլինեն առավելապես գյուղական բնակավայրեր։
