Երբ դուք կրակի հետ եք խաղում, այդ կրակը ցանկացած պահի կարող է հրդեհի վերածվել․ Ֆիդան

Իսրայելի կառավարությունն իր տարածքային ձեռքբերումները վեր է դասում անվտանգության ոլորտի մտահոգությունից։ Այս մասին հեռուստաեթերում հայտարարել է Թուրքիայի ԱԳ նախարար Հաքան Ֆիդանը՝ մեկնաբանելով օկուպացիոն բանակի շարունակական ներխուժումը Գազայի հատված։

«Իսրայելը անվտանգության հետևից չի ընկնում։ Իսրայելն ավելի շատ տարածքներ է ուզում»,- ուշադրություն է հրավիրել թուրքական դիվանագիտության ղեկավարը։

Ֆիդանն ընդգծել է, որ Իսրայելն իրական անվտանգության մեջ չի լինի այնքան ժամանակ, քանի դեռ իր կառավարությունը կանաչ լույս չի վառել պաղեստինյան պետության ստեղծման համար:

Առանձին-առանձին Թուրքիայի ԱԳ նախարարն անդրադարձել է Մերձավոր Արևելքում ԱՄՆ-ի և Իրանի միջև շփման սրման հեռանկարին՝ հարվածների չդադարող փոխանակման լույսի ներքո: Նրա խոսքով՝ բոլոր կողմերը պետք է խուսափեն հակամարտության մասշտաբների ընդլայնումից։

«Իրավիճակն այնքան էլ լավ չէ»,- նշեց նախարարը։

Միևնույն ժամանակ Ֆիդանը վստահություն է հայտնել, որ նախագահ Ջո Բայդենի վարչակազմի որոշումը՝ ինտենսիվ հարվածներ հասցնել Սիրիայում և Իրաքում տեղի խմբավորումների դիրքերին՝ ի պատասխան Հորդանանում իր զինվորականների մահվան, կրակի հետ խաղ է:

«Երբ դուք կրակի հետ եք խաղում, այդ կրակը ցանկացած պահի կարող է հրդեհի վերածվել»,-ասաց արտգործնախարարը՝ հավելելով, որ իրավիճակը կարող է ինչ-որ փուլում դուրս գալ վերահսկողությունից։

«Այստեղ մենք ռիսկի ենք հանդիպում։ Անկառավարելիության այս հարցը սպառնալիք է»,- ասել է նա։