ՌԴ-ն հատուկ կենտրոններ կբացի ՀՀ–ում և ևս 7 երկրում

Ռուսաստանը մտադիր է ութ երկրներում հատուկ կենտրոններ բացել հայրենակիցներին հյուպատոսական ծառայություններ մատուցելու համար։ Այս մասին ՏԱՍՍ-ին հայտնել է ՌԴ ԱԳՆ հյուպատոսական դեպարտամենտի ղեկավար Ալեքսեյ Կլիմովը։

Ըստ նրա՝ խոսքը Արգենտինայի, Հայաստանի, Ղազախստանի, Ղրղզստանի, Արաբական Միացյալ Էմիրությունների, Սերբիայի, Տաջիկստանի և Ուզբեկստանի մասին է:

«Համապատասխան կազմակերպություններն աշխատանքի կանցնեն օտարերկրյա պետությունների տարածքում իրենց իրավական կարգավիճակի կարգավորման հետ կապված հարցերը լուծվելուն պես։ Այսուհետ հյուպատոսական ծառայությամբ հետաքրքրված քաղաքացիները անմիջապես արտասահմանյան հաստատություն դիմելու հնարավորությունից բացի այլընտրանքային տարբերակ ունեն՝ հնարավորինս սեղմ ժամկետներում ստանալ պահանջվող փաստաթուղթը համապատասխան տեղեկատվական-խորհրդատվական կենտրոնից՝ չսպասելով հյուպատոսական հիմնարկում ընդունելության իրենց հերթին», - ասել է Կլիմովը։

Նրա կարծիքով՝ նման կենտրոնների բացումն ուղղված է դիմումատուների սպասման ժամանակի կրճատմանը, ՌԴ արտասահմանյան հաստատությունների թողունակության բարձրացմանը «վերջին երկու տարվա ընթացքում արտասահմանում բնակվող Ռուսաստանի քաղաքացիների թվի էական աճի և հյուպատոսական ծառայությունների պահանջարկի էքսպոնենտ աճի պայմաններում»:

Թվարկված ութ երկրները ներառված են Ռուսաստան արտաքին գործերի նախարարության նախագծում՝ նպատակ ունենալով ընդլայնել այն երկրների ցանկը, որոնցում նախարարության ենթակայության տակ գտնվող կազմակերպությունները կարող են աջակցել Ռուսաստանի հյուպատոսություններին՝ առանձին հյուպատոսական գործողություններ կատարելու և դիմորդների փաստաթղթերի ընդունման գործում: